«Օրինաց երկիր» կուսակցության նախագահ Արթուր Բաղդասարյանը վստահեցնում է, որ 2017 թվականի աշնանն իրենց կուսակցության Վանաձորի գրասենյակն է որոշում կայացրել այլեւս չբոյկոտել ավագանու նիստերն ու համագործակցության հուշագիր ստորագրել ՀՀԿ-ի հետ: Այսօր՝ փետրվարի 24-ին, լրագրողներն Արթուր Բաղդասարյանից հետաքրքրվեցին, թե ինչո՞ւ ՕԵԿ-ը նման որոշում կայացրեց:
«Որովհետեւ տարածքային կառույցն այդպես որոշեց: Հետո հավերժ բոյտոկով մարդիկ չէին կարողանում հարցը լուծել, տարածքային կառույցի որոշումն էր դա: Տեղական կառույցն է քվեների տեղը, տեղական կառույցներն են գնացել եւ քվեարկել»,- ասաց նա:
Լրագրողների հարցին, թե Վանաձորի քաղաքապետի փակ, գաղտնի քվեարկությունից հետո ո՞ւմ էր Հեղինե Բիշարյանն «անբարոյական» անվանել, Արթուր Բաղդասարյանն արձագանքեց. «Հեղինե Բիշարյանն ասել է՝ այդ չորս մարդը, որոնք քվեարկել են, անբարոյական են: Սա չի վերաբերում մեկ տարի հետո տեղական կառույցների միջեւ համագործակցությանը»:
Հիշեցնենք, որ Վանաձորի ավագանու նիստից հետո, երբ փակ, գաղտնի քվեարկությամբ Մամիկոն Ասլանյանը քաղաքապետ էր ընտրվել, ՕԵԿ ներկայացուցիչ Հեղինե Բիշարյանը հայտարարել էր, թե իրենց խմբակցությունից ոչ ոք չի խախտել նախապես ձեռք բերված պայմանավորվածությունը եւ դեմ է քվեարկել Ասլանյանի թեկնածությանը: «Ես վստահ եմ, որ իմ քաղաքական թիմը հստակ ընտրել է իր սկզբունքի համաձայն, ինչ որոշում որ եղել է: Իսկ նրանք, ովքեր շեղվել են ընդհանուր համաձայնությունից, ուղղակի անբարոյականներ են»,- ասել էր Բիշարյանը:
Ավելի վաղ NEWS.am-ը հայտնել էր, որ «Հայկական վերածնունդ» կուսակցության Վանաձորի կառույցը 2017 թվականի աշնանը համաձայնագիր է ստորագրել ՀՀԿ-ի հետ, որի շնորհիվ հանրապետության երրորդ քաղաքի ավագանիում քաղաքապետը մեծամասնություն է ստացել: Մինչ այդ «Հայկական վերածնունդը» հերքում էր Վանաձորի քաղաքապետի հետ բանակցություններ վարելու հնարավորությունը՝ հայտարարելով, թե հավատարիմ է «Լուսավոր Հայաստանի» եւ «Բարգավաճ Հայաստանի» հետ ստորագրած հուշագրին: