«Օրինաց երկիր» կուսակցության նախագահ Արթուր Բաղդասարյանն այսօր` փետրվարի 24-ին, կուսակցության 15-րդ համագումարի ժամանակ հայտարարեց, որ վերադառնում են իրենց ակունքներին:
«Վերադառնում ենք մեր ակունքներին: Ունեցե՞լ ենք սխալներ, իհարկե, ունեցել ենք: Ճակատագրակա՞ն են եղել դրանք, չեմ կարծում, ազնի՞վ ենք եղել, իհարկե՝ ազնիվ ենք եղել, հաջողվե՞լ է մեր ծրագրերն իրականացնել, լոկալ առումով որոշ պայմաններում հաջողվել է»,- ասաց նա:
Հիշեցնենք, որ «Հայկական վերածնունդ» կուսակցությունը շաբաթներ առաջ լուծարվել է, ինչից հետո որոշում է կայացվել կուսակցությունը նորից «Օրինաց երկիր» անվանել:
Համագումարի ժամանակ Արթուր Բաղդասարյանը նշեց, որ «Հայկական վերածնունդ» կուսակցության նպատակն էր Հայաստանում նոր հասարակական ուժ ձեւավորել, ստեղծել համախմբված, միավորված քաղաքական կազմակերպություն, որը գնալու էր երկիրը վերականգնելու ճանապարհով: «Ստացվե՞ց իրականացնել այդ գործընթացը, ես կարող եմ ասել՝ ե՛ւ այո, ե՛ւ ոչ: Բնականաբար, նաեւ գաղափարը չստացվեց, քանի որ խորհրդարանական ընտրություններից առաջ մի քանի կուսակցություններ հայտարարեցին իրենց անդամակցությունը դադարեցնելու մասին»,- հավելեց Բաղդասարյանը:
Նշենք, որ համագումարի ընթացքում կրկին կուսակցության նախագահ ընտրվեց Արթուր Բաղդասարյանը: