Ադրբեջանի նախագահ Իլհամ Ալիեւի՝ Երեւան ադրբեջանցիների վերադարձի մասին հայտարարությունը կարող է հանգեցնել տարածաշրջանի իրավիճակի ապակայունացմանը եւ ավելորդ լարվածություն է առաջացնում: Այս մասին NEWS.am-ի թղթակցի հետ զրույցում ասել է ռուս վերլուծաբան Ստանիսլավ Տարասովը:
Այսպիսով, նա նշել է, որ ադրբեջանական պետության ղեկավարի վերջին հայտարարությունների վերաբերյալ մտահոգություն են հայտնել նաեւ Ռուսաստանի ԱԳՆ-ում:
«Եթե դիտարկենք այն բոլոր հայտարարությունները, որոնք կատարվել են այս տարիների ընթացքում, ակնհայտ է դառնում, որ դրանք որոշակի գործիքներ են որոշակի ծրագրերի իրականացման համար, եւ նրանք կարող են շատ լուրջ հարված հասցնել բանակցային գործընթացին», - բացատրել է փորձագետը:
Միեւնույն ժամանակ, ինչպես նշել է վերլուծաբանը, եթե նման հայտարարություններ են արվում, ապա վաղ թե ուշ դրանք պետք է իրականացնել: Այնպես որ, առաջին քայլը, որը կարող է ազդանշան լինել հայկական կողմի համար, կլինի Բաքվի հայտարարությունը Լեռնային Ղարաբաղի հակամարտության կարգավորման բանակցային գործընթացից դուրս գալու մասին, որն իր հերթին կարող է հանգեցնել երկրորդ քայլի` պատերազմի: Սակայն, ինչպես նշել է Տարասովը, դա դեռ չի կատարվում, եւ Ադրբեջանը, որը հաճախ փորձում է շանտաժի ենթարկել եւ ահաբեկել է ԵԱՀԿ Մինսկի խմբի համանախագահներին եւ հայկական կողմին, մասնավորապես, բանակցային գործընթացից դուրս գալու հայտարարություններով, ըստ էության, բլեֆ է անում, եւ ոչ ավելին: