«ԱվտոՎԱԶ»-ի նախկին գլխավոր կոնստրուկտոր Գեորգի Միրզոեւը փետրվարի 23-ին մահացել է 83 տարեկանում, հայտնում է «Տոլյատիի նորություններ» պորտալը:
Հայրական կողմից Միրզոեւ ազգանունը կրող հայը ծնվել է Թբիլիսիում: Նրա հայրն ու պապիկը աշխատում էին Թբիլիսիի շարժակազմերի վերանորոգման գործարանում:
1951 թվականին դպրոցն ավարտելուց անմիջապես հետո Գեորգին ընդունվել է Մոսկվայի ավտոմեքենայական ինստիտուտ: Ընդունվելով ինստիտուտի ասպիրանտուրա՝ նա հետո իր ճակատագիրը կապել է Տոլյատիի հետ:
Գեորգի Կոնստանտինովիչը մասնակցել է մեծ թվով ավտոմեքենաների մշակմանը եւ թողարկմանը, առանց որոնց ԽՍՀՄ-ի եւ Ռուսաստանի ավտոարտադրությունն ուղղակի անհավանական էր՝ ՈՒԱԶ-452, ՈՒԱԶ-469, ՎԱԶ-2121 Նիվա, ՎԱԶ-2105… Միզոեւի գլխավոր հաղթանակներից մեկը իրավամբ համարվում է ՎԱԶ-2108-ը, որը ներկայումս դարձել է կուլտային «08», որն իր ժամանակին գործարկել է հայրենական ավտոմեքենաշինության նոր դարաշրջանը: Իսկ այնուհետեւ եղել են ՎԱԶ-2110, «Սամարա-2», ՎԱԶ-1111 Օկա, ՎԱԶ-2123 (ներկայումս՝ Chevrolet Niva), ՎԱԶ-1119 Կալինա ընտանիքները:
Վերջին տարիներին նա զբաղվում էր վառելիքի այլընտրանքային տեսակներով աշխատող ավտոմեքենաների մշակմամբ: Տեխնիկական գիտությունների թեկնածու, պրոֆեսոր Միրզոեւը նաեւ ավտոմեքենաշինության վերաբերյալ մի քանի գիտական աշխատությունների հեղինակ է:
Հրաժեշտի արարողությունը տեղի կունենա փետրվարի 26-ին մոսկովյան №36 հիվանդանոցում: Հուղարկավորությունը եւս տեղի կունենա ՌԴ մայրաքաղաքում:
