Արաբական պետությունների լիգայի (ԱՊԼ) գլխավոր քարտուղար Ահմեդ Աբուլ Գեյթը Սիրիայում հակամարտության բոլոր կողմերին կոչ է արել պահպանել ՄԱԿ-ի Անվտանգության խորհրդի՝ փետրվարի 24-ին ընդունված բանաձեւը, որը նախատեսում է 30 օրով դադարեցնել զինված բախումները, հաղորդում է «ՌԻԱ Նովոստի»-ն:
«Գլխավոր քարտուղարը ողջունել է Սիրիայում 30 օրով բախումները դադարեցնոլու վերաբերյալ 2401 բանաձեւը... Նա բոլոր շահագրգիռ կողմերին կոչ է արել հետեւել այս բանաձեւին, անմիջապես դադարեցնել կրակը Սիրիայով մեկ եւ ապահովել մարդասիրական բեռների անարգել մատակարարումն արգելափակված տարածքներին»,- նշվում է պանարաբական կազմակերպության հայտարարության մեջ:
Աբուլ Գեյթը հույս է հայտնել, որ այս բանաձեւը քայլ կդառնա դեպի Սիրիայում անժամկետ եւ համապարփակ հրադադարը: «Սիրիայի ճգնաժամի կարգավորումը հնարավոր է միայն ՄԱԿ-ի հովանու ներքո համապարփակ քաղաքական գործընթացի ճանապարհով, իսկ ռազմական որոշումները, ուժի անհամաչափ կիրառումը միայն սրում են իրավիճակը»,- նշվում է հայտարարության մեջ:
