Նոր Սահմանադրությունն արդեն քայլեր է արել, կա Բարձրագույն դատական խորհուրդ, որն անմիջականորեն չի ենթարկվում կառավարությանը, ԱԺ-ին եւ նախագահին, ինչն արդեն դրական երեւույթ է, որովհետեւ ինչ-որ չափով բացառում է «վերեւի մարդու» սինդրոմը։ Այս մասին, «Ազատություն» ռադիոկայանին տված հարցազրույցում նշել է Հայաստանի հանրապետական կուսակցության Հայաստանի 4-րդ նախագահի թեկնածու Արմեն Սարգսյանը։

Նրա խոսքով, իր՝ ՀՀ նախագահ ընտրվելու պարագայում կփորձի կատարելագործել դատական համակարգը՝ արձագանքելով խնդիրների դեպքում. «Եթե ես լինեմ նախագահը, եթե սկզբունքային տարբերություններ ունենամ, մի՛ կասկածեք, որ կիրացնեմ սեփական կարծիքն արտահայտելու իրավունքը, որ նախագահն ունի՝ լինի չստորագրելով կամ խոսելով, որովհետեւ դա է այն ճանապարհը, որով կկարողանանք համակարգը մաքրել, բյուրեղացնել»,-ասաց Արմեն Սարգսյանը։

 Անդրադառնալով դատական իշխանությանը, նա ընդգծեց, որ գործարարության համար, անկախ դատարանը հարստություն է: «Աշխարհում կորպորատիվ պայմանագրերի մեծ մասը ստորագրվում է, այսպես կոչված, անգլիական օրենքով. պատճառն այն է, որ այդ դատարանի նկատմամբ վստահություն կա, որովհետեւ այդ դատարանում կկարողանաս դատի տալ աշխարհի ամենահարուստ մարդուն եւ հաղթել, քանի որ չես կասկածում այդ դատարանի անաչառությունը: Հայաստանի համար դա բացարձակ անհրաժեշտություն է»։