Առաջին մարդը կկարողանա Մարսի վրա իջնել արդեն 20 տարի հետո՝ տիեզերական հետազոտությունների ոլորտում նոր դարաշրջան բացելու շնորհիվ: Նման կանխատեսում է կատարել բրիտանացի տիեզերագնաց Թիմ Պիկը, հայտնում է The Independent պարբերականը:
Նրա խոսքով՝ փետրվարին ավելի վաղ իրականացված Իլոն Մասկի Space X ընկերության Falcon Heavy գերծանր հրթիռակրի հաջող արձակումը մարդու կողմից տիեզերքի նվաճման պատմության մեջ նոր էջ է բացել: «Մենք տիեզերական հետազոտությունների նոր դարաշրջան ենք մտնում, որը շատ ու շատ հետաքրքիր է,- ասել է նա: - Կարծում եմ՝ մարդիկ Մարսի վրա կլինեն 2030-ական թվականների վերջին: Հենց այս ուղղությամբ են աշխատում պետական տիեզերական գործակալություններն ու տիեզերքի հետազոտման Միջազգային համակարգող խումբը»:
Բրիտանացի տիեզերագնացը համոզված է, որ միջազգային մերձլուսնային կայանի նախագիծը (Deep Space Gateway, DSG ծրագիր) ապագայում առանցքային դերակատարում կունենա մարդու կողմից տիեզերական տարածության յուրացման գործում: «DSG-ի կառուցումը, հավանաբար 2022 թվականին կսկսվի: Սա այն է, ինչին իսկապես անհամբերությամբ եմ սպասում, քանի որ դա ճանապարհ կհարթի ինչպես Լուսնի մակերեւույթին վայրէջք կատարելու թռիչքների իրականացման, այնպես էլ Մարս թռիչքներ կատարելու փոխադրամիջոցներ ստեղծելու համար»,- ասել է Պիկը:
