Հռոմի իշխանությունները հանձնարարել են փակել քաղաքի դպրոցներն ու մանկապարտեզները երկուշաբթի օրը Իտալիայի մեծ մասը պատած սիբիրյան ցիկլոնի պատճառով, հաղորդում է «ՌԻԱ Նովոստի»-ն:
Սառը քամին, որը իտալական ԶԼՄ-ներում Buran կամ Burian են կոչել, անցյալ շաբաթվա վերջին Ապեննիներին անսովոր ցածր ջերմաստիճաններ եւ առատ ձյան տեղումներ է բերել: Մարչեի, Էմիլիա-Ռոմանյեի, Մոլիզեի եւ Տոսկանայի կենտրոնական շրջաններում, որտեղ կիրակի օրը ձյուն էր տեղացել, քաղաքացիական պաշտպանության ծառայությունը դեղին մակարդակի վտանգ է հայտարարել:
Երկրի հյուսիսում՝ Պիեմոնտում, շաբաթվա սկզբին սպասվում է -10 աստիճան ցուրտ, իսկ լեռներում՝ -16 աստիճան:
Մայրաքաղաքից բացի, երկուշաբթի օրը դպրոցներն ու մանկապարտեզները չեն աշխատի նաեւ կենտրոնական Լացիոյի շրջանի այլ քաղաքներում, ինչպես նաեւ Կամպանիայում եւ Տոսկանայում: Իսկ հավերժ քաղաքում եղանակի կանխատեսումը երկուշաբթի երեկոյան ձյան տեղումներ է խոստանում: