Փետրվարին 22-ին ԱՄՆ-ում Արցախի Հանրապետության մշտական ներկայացուցիչ Ռոբերտ Ավետիսյանը ելույթով հանդես է եկել Նյու Յորքի Հայ Բարեգործական Ընդհանուր Միության (ՀԲԸՄ) գրասենյակում կազմակերպված միջոցառմանը, որը նվիրված էր արցախահայության ազգային-ազատագրական պայքարի՝ ղարաբաղյան շարժման 30-րդ տարեդարձին։ Միջոցառմանը մասնակցել է նաեւ ՄԱԿ-ում ՀՀ մշտական ներկայացուցիչ, դեսպան Զոհրաբ Մնացականյանը։

Ռոբերտ Ավետիսյանն իր ելույթում անդրադարձ է կատարել ղարաբաղյան շարժման պատմաիրավական հիմքերին, Արցախի Հանրապետությունում պետականաշինության գործընթացին եւ տնտեսական իրավիճակին, ինչպես նաեւ ադրբեջանա-ղարաբաղյան հակամարտության կարգավորման հեռանկարներին: Այնուհետեւ Արցախի մշտական ներկայացուցիչը պատասխանել է ներկաների հարցերին, որոնք վերաբերում էին 2016 թ. ապրիլին Արցախի դեմ Ադրբեջանի սանձազերծած ագրեսիային եւ դրա հետեւանքներին, Արցախի պաշտպանությանն ու անվտանգությանը, հանրապետությունում ընթացող բարեփոխումներին, բանակցային գործընթացին եւ այլ թեմաների։

Միջոցառման ժամանակ նաեւ տեղի է ունեցել լուսանկարիչ Դավիթ Հակոբյանի՝ Հայաստանի եւ Արցախի զինված ուժերին նվիրված լուսանկարների ցուցահանդես։