«Ծառուկյան» դաշինքը վերջապես պաշտոնապես հայտարարեց. կողմ են քվեարկելու ՀՀԿ-ի նախագահի թեկնածու Արմեն Սարգսյանին: Գագիկ Ծառուկյանը հանդիպել է խմբակցության պատգամավորների հետ, քննարկել են հարցը եւ վերջնական որոշում կայացրել: Խմբակցության ղեկավարը նաեւ հիմնավորել է. իրենց մոտեցումները համընկնում են Արմեն Սարգսյանի մոտեցումներին: Նշենք, որ Հայաստանի 4-րդ նախագահին ընտրելու է Ազգային ժողովը. քվեարկությունը կկայանա այս ուրբաթ՝ մարտի 2-ին: Առաջին իսկ փուլով ընտրվելու համար Արմեն Սարգսյանին անհրաժեշտ է 79 պատգամավորի կողմ քվե: Կոալիցիոն գործընկերներ ՀՀԿ-ն ու ՀՅԴ-ն ունեն 65 մանդատ, իսկ «Ծառուկյան» դաշինքի որոշման արդյունքում կարելի է արդեն վստահ ասել, որ Հանրապետականի առաջադրած նախագահի թեկնածուն կընտրվի հենց առաջին փուլով:
Սամվել Բաբայանի գործով վերաքննիչ բողոքի քննությունն ավարտվեց: Նշենք, որ առաջին ատյանի դատարանը մի խումբ անձանց կողմից ապօրինի «Իգլա» զենահրթիռային համալիր ձեռք բերելու, փոխադրելու, ինչպես նաեւ փողերի լվացման մեղադրանքով Արցախի պաշտպանության բանակի նախկին հրամանատարին դատապարտել է 6 տարի ժամկետով ազատազրկման: Բաբայանը պահանջում է արդարացնել իրեն՝ հայտարարելով, որ մեղադրանքը շինծու է, իսկ իրեն ազատազրկելու դրդապատճառը՝ քաղաքական: Վերաքննիչ դատարանը գործով դատավճիռը հրապարակվելու է վաղը՝ փետրվարի 27-ին:
Ողբերգական դեպք Արմավիրում. Մեծամորի քաղաքային աղբանոցում այսօր նորածնի դի են հայտնաբերել: Մեր տեղեկություններով՝ նորածինը տղա է: Իրավապահները փորձում են պարզել երեխայի մահվան հանգամանքները: Քննչական կոմիտեն տեղեկացնում է, որ երեխան ֆիզիկական արատներով է ծնվել: Մասնավորապես, դատաբժիշկներն արձանագրել են, որ նորածինը գլխի, պարանոցի, կրծքավանդակի եւ որովայնի շրջանում փափուկ հյուսվածքների դեֆեկտներ ունի, բացի այդ՝ բացակայում է աջ ձեռքի դաստակն ու ձախ ձեռքը՝ ամբողջությամբ: Նորածնի ծնողների մասին առայժմ որեւէ տեղեկություն չի հրապարակվում:
Արարատի մարզում էլ փետրվարի 24-ին 2.5 տարեկան երեխա է կորել: Մի քանի ժամ անց փոքրիկի դին դուրս են բերել ջրանցքից: Բուրաստան համայնքի ղեկավարը մեր թղթակցին ասել է, որ երեխան, ամենայն հավանականությամբ, սայթաքել ու ջրանցքն է ընկել: Արտաքին զննությամբ դիակի վրա բռնության հետքեր չեն հայտնաբերել: Գյուղապետը պատմել է նաեւ, որ վերջին անգամ տղային պապն է տեսել. գոմի մոտ աշխատելիս երեխային տուն են ուղարկել՝ խնձոր բերելու, բայց այդպես էլ չի վերադարձել:
23-րդ ձմեռային Օլիմպիական խաղերը նույնպես պատմություն դարձան: Հարավկորեական Փհենչհանում 2018 թվականի Օլիմպիադան ավարտվեց փետրվարի 25-ին, ՄՕԿ-ի նախագահն օլիմպիական դրոշը փոխանցեց Պեկինի քաղաքապետին. 2022 թվականի փետրվարի 4-20-ին հենց այստեղ են անցկացվելու 24-րդ ձմեռային Օլիմպիական խաղերը: Իսկ Փհենչհան-2018-ում վիճարկվեց մեդալների 102 հավաքածու, մրցումներին մասնակցեցին 2925 մարզիկներ 92 երկրից: Մեդալային հաշվարկում հաղթեց Նորվեգիան՝ նվաճելով ռեկորդային քանակությամբ՝ 39 մեդալ. 14 ոսկի, 14 արծաթ, 11 բրոնզ: Մեդալների քանակով երկրորդը Գերմանիան էր, իսկ լավագույն եռյակը եզրափակեց Կանադան: Հարավային Կորեայում Հայաստանը ներկայացնող 3 մարզիկները, սակայն, մրցանակային տեղեր չգրավեցին:
«Եվրատեսիլ 2018»-ում Հայաստանը կներկայացնի Սեւակ Խանաղյանը: «Դեպի Եվրատեսիլ» նախագծի եզրափակիչ համերգին եվրատեսիլյան ուղեգրի համար պայքարում էր տասը մասնակից: Միջազգային ժյուրիի եւ հեռուստադիտողի քվեարկության արդյունքում, սակայն, հաղթող ճանաչվեց Սեւակը՝ «Քամի» երգով: Նշենք, որ այս տարի «Եվրատեսիլ»-ն անցկացվելու է Պորտուգալիայում: Հայաստանի ներկայացուցիչը ելույթ կունենա մայիսի 9-ին՝ առաջին կիսաեզրափակիչում:
Սեւակ Խանաղյանը մասնակցել է ռուսական եւ ուկրաինական մի քանի հեռուստանախագծերի: Նրան մեծ հաջողություն է բերել ուկրաինական «X ֆակտոր»-ին մասնակցությունը, որից հետո էլ սկսվել են նրա համերգային շրջագայությունները: Սեւակը մի քանի մենահամերգ է ունեցել նաեւ Երեւանում, իսկ անցյալ տարի ընդգրկվել է «Հայաստանի Ձայնը» նախագծի ժյուրիի կազմում:
Հարավկորեական Samsung ընկերությունը ներկայացրել է իր հերթական ֆլագմանները՝ Galaxy S9 և S9+ սմարթֆոնները: Շնորհանդեսը տեղի է ունեցել փետրվարի 25-ին: Galaxy S9-ի օպերատիվ հիշողությունը 4 ԳԲ է, հիմնականը՝ 64 կամ 128 ԳԲ: Galaxy S9+-ն էլ 6 ԳԲ օպերատիվ եւ 64, 128 կամ 256 ԳԲ հիմնական հիշողություն ունի: Եվրոպայում Galaxy S9-ը կարժենա 849 եվրո, իսկ S9+-ի գինը կլինի 949 եվրո:
Փետրվարի 26-ին դոլարի ու եվրոյի վերելքին միացել է նաեւ ռուբլին: Դոլարի փոխարժեքը կազմել է 480 դրամ, եվրոյինը՝ 593, ռուբլունը՝ 8 դրամ 60 լումա, ֆունտինը՝ 675 դրամ:
Փետրվարի 27-ին հանրապետության շրջանների զգալի մասում տեղումներ են սպասվում: Օդի ջերմաստիճանն էապես չի փոխվի: Երեւանում նույնպես վաղը ժամանակ առ ժամանակ անձրեւ է սպասվում: Մայրաքաղաքում գիշերը կդիտվի +3+5, ցերեկը՝ +12+14 աստիճան տաքություն:
