«Մարտի 1-2 դեպքերի վերաբերյալ «Ելք»-ի նախագծին ՀՀԿ-ի կողմ քվեարկելու դրդապատճառը մեկն է, իրենք ասում են, որ այդ հարցն իրենց համար նույնչափ կարեւոր է եւ իրենք չեն վախենում այդ հարցը քննարկելուց»: Այս մասին այսօր Ազգային ժողովում լրագրողների հետ զրույցում ասաց «Ելք» խմբակցության պատգամավոր Արամ Սարգսյանը:
Նրա խոսքով, նախորդ քննարկման ժամանակ, իրենց ելույթներում, ՀՀԿ-ականները միտումնավոր սլաքն ուղղում էին իրենց նախկին նախագահ Ռոբերտ Քոչարյանի վրա:
Ըստ Արամ Սարգսյանի՝ գլխավոր հարցը այն է, թե այդ գիշերն ո՞վ է հրաման տվել, որ մտնեն Ազատության հրապարակ. «Գործընթացներն ամսի 26-ից հետո գնում էին մարման: Դա ակնհայտ էր բոլորին: Ու այստեղ արդյոք քաղաքական միտում կա՞ր: Մամուլն է բազմիցս անդրադարձել դրան, որ Ռոբերտ Քոչարյանն ինքնուրույն այդ որոշումը կայացրած լինի՝ հետագայում իրենց ավելի թույլ նախագահ ունենալու եւ իր՝ պահանջարկված լինելու խնդիրը լուծելու համար: Եթե կա այս հարցը, ու ՀՀԿ-ն ուզում է այս խնդիրը լուծել, ճիշտ կանի, որ այդ հարցը բարձրացնի, ու եթե նախկին նախագահն իր բնավորությունը չի փոխել, ինքը պիտի Նիկոյանի նախկին ասածին հակադարձի»,-ասաց պատգամավորը:
Հիշեցմանը, որ Սամվել Նիկոյանն ակնարկել էր, որ «Ելք»-ին իր PR-ի հարցն է լուծում, քանի որ իր կարծիքով, դաշինքի առաջնորդները չեն ցանկանում, որ այդ իրադարձությունները բացահայտվեն, Արամ Սարգսյանն ասաց` տարօրինակ կլիներ, որ ՀՀԿ-ականները, այդ թվում նաեւ Սամվել Նիկոյանը, այլ հայտարարություն անեին: