Հայաստանում բացված «Մեղրի» ազատ տնտեսական գոտին եւ Իրանում գործող «Արաս»-ը կնպաստեն երկու երկրների միջեւ գործարար կապերի զարգացմանը: Նման կարծիք Երևանում հայ-իրանական միջկառավարական հանձնաժողովի 15-րդ նիստի շրջանակներում լրագրողների հետ զրույցում հայտնել է ՀՀ էներգետիկայի ենթակառուցվածքների եւ բնական պաշարների նախարար Աշոտ Մանուկյանը:
Ըստ նրա՝ նման ազատ տնտեսական գոտիների համագործակցությունը հնարավորություն կտա վերացնել հայկական բիզնեսի՝ իրանական շուկա մուտք գործելու ճանապարհին առկա խոչընդոտները եւ՝ հակառակը: «Ոչինչ չի խանգարում Հայաստանին եւ Իրանին զարգացնել գործնական շփումները»,- ասել է Աշոտ Մանուկյանը՝ մեկնաբանելով երկու երկրների գործարար շրջանակների ներկայացուցիչների հայտարարություններն այն մասին, որ Հայաստանի եւ Իրանի օրենսդրությունների միջև տարբերությունը խոչընդոտում է առեւտրաշրջանառության աճին եւ գործարար կապերի ակտիվացմանը:
