Երուսաղեմի քաղաքապետը կասեցրել է քրիստոնեական եկեղեցիներին պատկանող անշարժ գույքի հարկադրման պլանը, որը վրդովվեցրել էր կրոնական առաջնորդներին եւ հանգեցրել Տիրոջ գերեզմանի տաճարի փակմանը, փոխանցում է AP-ն։

Վարչապետ Բենիամին Նեթանյահուի գրասենյակի հայտարարության մեջ նշվում է, որ «լուծումը ձեւակերպելու նպատակով» մասնագիտական թիմ կձեւավորվի եկեղեցիների ներկայացուցիչների հետ բանակցությունների համար: «Արդյունքում, Երուսաղեմի քաղաքապետարանը կասեցնում է միջոցների գանձման քայլերը, որոնք այն ձեռնարկել էր վերջին շաբաթներին»,- նշվում է հաղորդագրության մեջ:

Անցյալ կիրակի՝ փետրվարի 25-ին, գլխավոր քրիստոնեական սրբավայրը՝ Երուսաղեմի՝ Տիրոջ գերեզմանի տաճարը, փակել էր իր դռներն ի նշան բողոքի Իսրայելի հարկային օրենսգրքում փոփոխությունների եւ նոր օրենքի դեմ, որը կարող էր թույլ տալ պետությանը հողատարածքներ գանձել եկեղեցուց: Տաճարի փակման մասին, որն ամբողջ աշխարհի քրիստոնյաների համար ամենասուրբ վայրերից մեկն է համարվում, համատեղ հայտարարության մեջ հայտնել էին կաթոլիկ, հունական ուղղափառ համայքների, ինչպես նաեւ Հայ առաքելական եկեղեցու ներկայացուցիչները։