Մեկնարկել է Ազգային ժողովի հերթական քառօրյան: Այն ինչ-որ առումով պատմական կարելի է համարել. նոր Սահմանադրության համաձայն՝ առաջին անգամ խորհրդարանն է ընտրելու հանրապետության նախագահին: Քվեարկությունը մարտի 2-ին է: Իսկ այսօրվա նիստում «Ծառուկյան» խմբակցությունը ռեյտինգային ընտրակարգից հրաժարվելու մասին օրինագիծ է քննարկման ներկայացրել: Ընտրական օրենսգրքում փոփոխությունների մասին այս նախաձեռնությունը խորհրդարանը 39 կողմ եւ 56 դեմ ձայնով մերժել է: Սակայն խորհրդարանական ուժերը, այդ թվում՝ ՀՀԿ-ի կոալիցիոն գործընկեր ՀՅԴ-ն, հարցը փակված չեն համարում. կարծում են, որ այս օրենսգիրքը հակաժողովրդավարական է:
Խորհրդարանի օրակարգում այսօր անսպասելիորեն եւս մեկ հարց է ընդգրկվել. պատգամավորները միաձայն կողմ են քվեարկել «Ելք»-ի նախաձեռնած Մարտի 1-ի իրադարձությունների մասին հայտարարության նախագիծն օրակարգում ընդգրկելուն: Անցյալ շաբաթ կայացած նիստում, սակայն, պետաիրավական հարցերի հանձնաժողովը բացասական եզրակացություն էր տվել նախագծին:
Պատգամավորները սկսել են քննարկել նաեւ Բարձրագույն դատական խորհրդի անդամների ընտրության հարցը. նոր մարմինը փոխարինելու է Արդարադատության խորհրդին: Բարձրագույն դատական խորհրդում մեկական անդամ կունենան խորհրդարանական բոլոր խմբակցությունները, իսկ խորհրդի նախագահի պաշտոնում կոալիցիան առաջադրել է Սահմանադրական դատարանի նախագահ Գագիկ Հարությունյանի թեկնածությունը:
Նիկոլ Փաշինյանը Հարությունյանին հարցրել է. արդյո՞ք 2014 թվականին Սերժ Սարգսյանը կատակում էր, երբ Սահմանադրական փոփոխությունների հանձնաժողովի անդամների հետ հանդիպման ժամանակ հայտարարում էր՝ չի հավակնելու վարչապետի պաշտոնին: Փաշինյանը նույն հարցն ուղղել է նաեւ մյուս թեկնածուներին, այդ թվում՝ Վահրամ Բաղդասարյանին: Հանրապետական պատգամավորի պատասխանից կարելի է ենթադրել, որ եթե Սերժ Սարգսյանն առաջադրվի վարչապետի պաշտոնում, ուրեմն կուսակցության որոշմանն է ենթարկվել: Բարձրագույն դատական խորհրդի անդամներին խորհրդարանը կընտրի վաղը, իսկ Նիկոլ Փաշինյանն այսօրվա քննարկումների համար անվանում է հորինել:
Մինչ այդ, մամուլում լուրեր են պտտվում, որ «Ելք»-ի պառակտման եզրին է. ասում են՝ Էդմոն Մարուքյանի «Լուսավոր Հայաստանը», հնարավոր է, հեռանա դաշինքից: Պատճառը, նույն աղբյուրների համաձայն, Սերժ Սարգսյանի վարչապետությունը տապալելու հարցի շուրջ քննարկումներն են: Մարուքյանը հերքում է թե՛ «Ելք»-ից հեռանալու, թե՛ խմբակցությունում վեճերի եւ նույնիսկ ձեռնամարտի մասին լուրերը:
6 տարվա ազատազրկումն ուժի մեջ մնաց. Վերաքննիչ քրեական դատարանն այսօր մերժել է Սամվել Բաբայանի բողոքն ու անփոփոխ թողել առաջին ատյանի դատարանի վճիռը: Երեկ Բաբայանը վերջին խոսքում կրկին չէր ընդունել մեղադրանքը՝ պահանջելով արդարացնել իրեն: Արցախի պաշտպանության բանակի նախկին հրամանատարն առաջադրված մեղադրանքները շինծու է համարում, իսկ իրեն ազատազրկելու դրդապատճառը՝ քաղաքական: Բաբայանի պաշտպանը պատրաստվում է բողոքարկել Վերաքննիչի վճիռը: Վերաքննիչ դատարանն անփոփոխ է թողել նաեւ գործով մյուս մեղադրյալներ Սանասար Գաբրիելյանի եւ Արմեն Պողոսյանի դատավճիռները: Նշենք, որ Սամվել Բաբայանն ու մի խումբ անձինք մեղադրվում են ապօրինի «ԻԳԼԱ» տեսակի զենահրթիռային համալիր ձեռք բերելու, փոխադրելու, ինչպես նաեւ փողերի լվացման համար:
Մեծամորում աղբանոցում մահացած հայտնաբերված նորածնի դեպքի մասին նոր մանրամասներ են հայտնի: Երեխայի մայրը հայտնաբերվել է. նա Մեծամորի 37-ամյա բնակչուհի է: Մահացած տղան, պարզվում է, կնոջ 7-րդ երեխան է. նրա 2 փոքրիկները մահացել են, 3 երեխաներն առողջական խնդիրներ ունեն եւ հատուկ խնամքի կենտրոնում են: Ներկայում կնոջ խնամքին 1.5 տարեկան երեխա կա: Կինը պատմել է նաեւ, որ տղային լույս աշխարհ է բերել տան լոգարանում. փոքրիկը մահացել է, մայրն էլ նրան փաթաթել է պոլիէթիլենային տոպրակով ու թողել աղբանոցում: Մինչ այդ, Քննչական կոմիտեն հայտնել էր, որ երեխան ֆիզիկական արատներով է ծնվել. մասնագետների տեղեկացմամբ՝ նա գլխի, պարանոցի, կրծքավանդակի եւ որովայնի շրջանում փափուկ հյուսվածքների դեֆեկտներ է ունեցել, բացի այդ՝ բացակայել է աջ ձեռքի դաստակն ու ձախ ձեռքը՝ ամբողջությամբ:
Արագածոտնում մահվան ելքով վթար է տեղի ունեցել: Պատահարի զոհերն ու տուժածները Կոտայքի Նոր Երզնկա գյուղից են: Ագարակ-Ոսկեվազ ավտոճանապարհին «Ford» մակնիշի ավտոմեքենան դուրս է եկել երթեւեկելի հատվածից եւ շրջվել: Ուղեւորներից 69-ամյա Ջուլիետա Գեւորգյանը տեղում մահացել է, երեք վիրավորների հիվանդանոց են տեղափոխել: Այստեղ մահացել է նաեւ մեքենայի մյուս ուղեւորը՝ 42-ամյա Սարգիս Ֆիդանյանը: Որոշ տեղեկություններով՝ գիշերն Արագածոտնի Ցամաքասար գյուղի բնակիչներից մեկն առեւանգել է վթարի ենթարկված մեքենայի վարորդի՝ 43-ամյա Աղասի Գեւորգյանի 18-ամյա դստերը: Գեւորգյանն էլ կնոջ, մոր՝ զոհված Ջուլիետա Գեւորգյանի եւ ընկերոջ՝ Սարգիս Ֆիդանյանի հետ գնացել է դստերը վերադարձնելու: Պատահարի դեպքով քրեական գործ է հարուցվել:
Երուսաղեմի քաղաքապետարանի կայացրած սկանդալային որոշման պատճառով քաղաքի քրիստոնեական գլխավոր սրբավայր Հարության տաճարը կամ Տիրոջ գերեզմանի տաճարը շարունակում է փակ մնալ: Նշենք, որ քաղաքապետարանը որոշել է հարկեր գանձել եկեղեցիներից ու վանքերից, ինչին ի պատասխան Սուրբ հողերի երեք իրավատեր՝ հայկական, ուղղափառ եւ կաթոլիկ եկեղեցիները փետրվարի 25-ից փակել են Հարության տաճարի դռները եւ պահանջում են չեղարկել որոշումը: Աշխարհի տարբեր անկյուններից Երուսաղեմ եկած քրիստոնյաները ցույց են կազմակերպել Հարության տաճարի մոտ՝ միանալով իշխանությունների որոշման դեմ բողոքին:
Իսկ Երուսաղեմի քաղաքապետարանը փորձում է խնդիրը լուծելու ուղիներ գտնել: Քաղաքապետը պարզաբանել է, որ հարկերի գանձման մասին որոշումը վերաբերում է եկեղեցապատկան «կոմերցիոն օբյեկտներին, օրինակ՝ հյուրանոցներին կամ ծառայողական շենքերին»: Մինչ այդ, հարկերի գանձնման մասին որոշումը կասեցվել է, Իսրայելի վարչապետի հանձնարարությամբ մասնագիտական խումբ է ստեղծվել՝ եկեղեցիների ներկայացուցիչների հետ հարցը քննարկելու եւ նոր որոշում կայացնելու համար:
Եվրոպայի որոշ հատվածներում կարծես խորը ձմեռ է հաստատվել: Եղանակը տհաճ անակնկալ է մատուցել հատկապես իտալացիներին: Մինչ այս առատ ձյան տեղումները կաթվածահար էին արել Հռոմի բնականոն կյանքը, իսկ այսօր ձյուն է տեղացել հարավային Նեապոլում. վերջին անգամ այստեղ ձյուն տեղացել է 1956 թվականին: Այստեղ փակվել են դպրոցները, միջազգային օդանավակայանը, դադարեցվել է ավտոբուսների եւ մետրոյի աշխատանքը: Իսկ Ֆրանսիայում սաստիկ ցրտի պատճառով առնվազն երեք անօթեւան է մահացել: Երկրի մի շարք շրջաններում ջերմաստիճանը զրոյից ցածր է, իսկ 68 դեպարտամենտներում իշխանությունները փորձում են ապաստան տրամադրել անօթեւաններին: Նշենք, որ անցյալ տարի Ֆրանսիայում շուրջ 500 անօթեւան է մահացել, իսկ այս տարեսկզբից միայն Փարիզում 13 մարդ է մահացել:
Փոխարենը Հայաստանի որոշ շրջաններում մարտին բավական տաք կլինի: Օդերեւութաբանների կանխատեսմամբ՝ ամսվա երկրորդ կեսին Երեւանում հնարավոր է մինչեւ +25 աստիճան տաքություն: Տեղումները, սակայն, հանրապետության բոլոր շրջաններում միջին բազմամյա քանակությունից ավելին կլինեն:
Փետրվարի 27-ին դոլարը շարունակել է ամրապնդել դիրքերը, իսկ եվրոն փոքր-ինչ թուլացել է: Դոլարի փոխարժեքը կազմել է 480 դրամ, եվրոյինը՝ 593, ռուբլունը՝ 8 դրամ 62 լումա, ֆունտինը՝ 671 դրամ:
Փետրվարի 28-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +2+4, ցերեկը՝ +14+16 աստիճան տաքություն: