Երուսաղեմում եկեղեցիներից եւ վանքերից հարկեր գանձելու՝ Երուսաղեմի քաղաքապետի որոշումից հետո փակված Հարության տաճարի դիմաց յուրահատուկ բողոքի ակցիայով են հանդես եկել քրիստոնյա արաբները։
NEWS.am-ի թղթակիցը Երուսաղեմից հայտնում է, որ քրիստոնյա արաբներն արաբերեն վանկարկումներով ու փայտե մեծ խաչով երթ են կազմակերպել, մոտեցել են Հարության տաճարին եւ բողոքի ակցիա անցկացրել իսրայելական իշխանությունների որոշման դեմ: Հարության տաճարի մոտ հավաքված բազմաթիվ լրատվամիջոցների ներկայացուցիչներն ու հարյուրավոր ուխտավորները զարմացած հետեւել են արաբների ակցիային:
Սուրբ հողերի երեք իրավատեր եկեղեցիները՝ հայկական, կաթոլիկ եւ ուղղափառ, փետրվարի 25-ից փակել են Հարության տաճարի դռները մինչեւ Երուսաղեմի քաղաքապետարանը չեղարկի եկեղեցիներից ու վանքերից հարկեր բռնագանձելու որոշումը։
Փետրվարի 27-ի երեկոյան արդեն AP-ն փոխանցել է, որ վարչապետ Բենիամին Նեթանյահուի գրասենյակի հայտարարության մեջ նշվում է, թե «լուծումը ձեւակերպելու նպատակով» մասնագիտական թիմ կձեւավորվի եկեղեցիների ներկայացուցիչների հետ բանակցությունների համար: «Արդյունքում, Երուսաղեմի քաղաքապետարանը կասեցնում է միջոցների գանձման քայլերը, որոնք այն ձեռնարկել էր վերջին շաբաթներին»,-նշվել է հայտարարության մեջ: Սակայն Երուսաղեմի հայոց պատրիարքարանի ներկայացուցիչները նշում են, որ դեռ պաշտոնապես իրենց ոչինչ չեն հայտնել։