Պատերազմը տիեզերքում մի քանի տարվա հարց է: Ֆլորիդայում 34-րդ ամենամյա ռազմաօդային ուժերի սիմպոզիումի եւ տեխնոլոգիական ցուցահանդեսի ժամանակ այս մասին հայտարարել է ԱՄՆ օդային ուժերի ղեկավար Դեվիդ Գոլդֆեյնը, գրում է «ՌԻԱ Նովոստի»-ն՝ վկայակոչելով Space News-ը: Իր խոսքում զինվորականը շեշտել է, որ Միացյալ Նահանգներին անհրաժեշտ է գերազանցության հասնել տիեզերական տարածությունում:
«Ես կարծում եմ, որ մենք տիեզերքից հարվածներ կհասցնենք արդեն մի քանի տարի հետո: Եվ մենք զորքերի այնպիսի տեսակ ենք, որը պետք է ղեկավարի համատեղ զինված գործողություններն այս նոր վիճարկելի տարածքում: Սա այն է, ինչ պահանջում է երկիրը»,- հայտարարել է Գոլդֆեյնը:
Ըստ պարբերականի՝ 2018 թվականի ԱՄՆ ռազմաօդային ուժերի բյուջեն տիեզերական ծրագրերի մասով 7.75 միլիարդ դոլար է կազմում, ինչը 20 տոկոսով ավել է, քան 2017 թվականին: Հաջորդ տարի նախատեսվում է ավելացնել այս թիվը՝ մինչեւ 8,5 մլրդ դոլար: