Ազգային ժողովում այսօր փակ, գաղտնի քվեարկությամբ ընտրել են Բարձրագույն դատական խորհրդի 5 անդամներին: Քվեարկության արդյունքները, սակայն, իրարանցման առիթ են դարձել: Բանն այն է, որ հայտարարվել է, թե ՍԴ նախագահ Գագիկ Հարությունյանին կողմ է քվեարկել 96 պատգամավոր, դեմ՝ 2-ը: Նիկոլ Փաշինյանը, սակայն, պնդում է, որ քվեարկությունը մասնակցած «Ելք»-ի բոլոր 7 պատգամավորները դեմ են քվեարկել Գագիկ Հարությունյանի եւ Գեւորգ Դանիելյանի թեկնածությանը: Փաշինյանը պահանջում է հետաքննություն անցկացնել:
Կրքերը տեղափոխվել են նաեւ նիստերի դահլիճ: «Ելք»-ից հաշվիչ հանձնաժողովի անդամ Լենա Նազարյանը նույնպես ստորագրել է քվեարկության արդյունքների արձանագրությունը: Պատգամավորը, սակայն, կասկածում է, որ հետո քվեաթերթիկները կարող էին փոխել: Բանավեճին փորձել է վերջ դնել Վահրամ Բաղդասարյանը՝ հայտարարելով, թե մի քանի ձայնը ոչ մի նշանակություն չունի իրենց համար, եւ կոչ արել խլրտումներ չմտցնել խորհրդարանի աշխատանքում:
Այսօր պատգամավորները նաեւ հանրապետական Գեւորգ Կոստանյանին պետաիրավական եւ մարդու իրավունքների պաշտպանության հարցերի հանձնաժողովի նախագահ են ընտրել, իսկ այդ պաշտոնը զբաղեցնող Հրայր Թովմասյանը Սահմանադրական դատարան է գնում:
Վաղը խորհրդարանն ընտրելու է նաեւ Հայաստանի 4-րդ նախագահին: Այսօր լրացել է թեկնածուների առաջադրման ժամկետը: Ազգային ժողովը միայն մեկ թեկնածուի առաջադրման դիմում է ստացել. Հանրապետական եւ Դաշնակցություն խմբակցությունների 65 պատգամավորների գրավոր դիմումով նախագահի պաշտոնում առաջադրվել է Արմեն Սարգսյանը:
Ազգային ժողովում հարգել են Սումգայիթի ջարդերի զոհերի հիշատակը. այսօր Ադրբեջանական ԽՍՀ-ում հայերի դեմ կատարված բռնությունների զոհերի եւ տեղահանված անձանց հիշատակության օրն է: Խորհրդարանը նաեւ միաձայն՝ 72 կողմ ձայնով Սումգայիթյան ոճրագործության 30-րդ տարելիցի կապակցությամբ ԱԺ հայտարարության նախագիծ է ընդունել: Սումգայիթյան ջարդերի զոհերի ոգեկոչման արարողություններ եւ բողոքի ցույցեր են կազմակերպվել նաեւ Արցախում եւ սփյուռքում: Հատկանշական է, որ խորհրդային շրջանում պաշտոնական վարկածի համաձայն՝ Սումգայիթում փետրվարի 27-29-ը 32 քաղաքացի է զոհվել, այդ թվում՝ 26 հայ եւ 6 ադրբեջանցի: Մինչդեռ, ոչ պաշտոնական տվյալներով, Սումգայիթում սպանված հայերի թիվը հարյուրից ավելի է:
Երկարատեւ հիվանդությունից հետո կյանքից հեռացել է ռեժիսոր, սցենարիստ Ալբերտ Մկրտչյանը: Նա 81 տարեկան էր: Ալբերտ Մկրտչյանը Մհեր Մկրտչյանի կրտսեր եղբայրն է: Երկար տարիներ նա եղել է հայկական հեռուստաստուդիայի, հետո նաեւ «Հայֆիլմ»-ի ռեժիսոր: Ղեկավարել է Գյումրիի դրամատիկական թատրոնը, իսկ 2000 թվականից Երեւանի Մհեր Մկրտչյանի անվան արտիստական թատրոնի տնօրենն և գեղարվեստական ղեկավարն էր: Ալբերտ Մկրտչյանը «Մեր մանկության տանգոն», «Հին օրերի երգը», «Ուրախ ավտոբուս» եւ մի շարք այլ հայտնի ֆիլմերի ռեժիսորն է:
Գառնու ձորում՝ «Քարերի սիմֆոնիա» հուշարձանի տարածքում կառուցված շինությունն ապամոնտաժվել է, իսկ կառուցապատողը վարչական պատասխանատվության է ենթարկվել. ստիպված կլինի 200 հազար դրամի չափով տուգանք վճարել: Տարածքի սեփականատերը, սակայն դժգոհ է: NEWS.am-ի հետ զրույցում նա նշել է, որ շինությունը «Քարերի սիմֆոնիայի» տարածքում չէ, բացի այդ՝ չէր պատրաստվում այնտեղ «սրճարան կամ խորովածանոց» բացել: Ծովինար Համբարձումյանը նաեւ համոզված է, որ ոչ մի կանոն չի խախտել, ամեն ինչ օրինական է եղել:
Երուսաղեմում Հարության տաճարն այսօր առավոտյան բացվել է: Երեք իրավատեր՝ հայ առաքելական, կաթոլիկ եւ ուղղափառ եկեղեցիները դժգոհում էին եկեղեցապատկան գույքը հարկելու՝ քաղաքապետարանի ծրագրերի դեմ, եւ երեք օր շարունակ փակել էին տաճարը: Երուսաղեմի քաղաքապետարանը հաշվարկել էր, որ եկեղեցիների ընդհանուր պարտքը քաղաքային բյուջեին գերազանցում է 186 մլն դոլարը, եւ անցած տարիների համար տուգանք ու բանկային հաշիվների կալանք սահմանել: Սրբավայրի պահապանները վերականգնել են ուխտավորների մուտքը Հարության տաճար այն բանից հետո, երբ Իսրայելի իշխանությունները պատրաստակամություն են հայտնել բանակցել խնդրի կարգավորման շուրջ:
Երեւանում արտակարգ դեպք է տեղի ունեցել. գիշերը հարձակում են գործել տրանսգենդերի վրա, ծեծել նրան ու հրդեհել բնակարանը: Բռնության ենթարկվածին հիվանդանոց են տեղափոխել. նա Վերակենդանացման բաժանմունքում է: Տրանսգենդերի անունը չի հրապարակվում. որոշ տեղեկություններով՝ տուժածն ինքն է հրաժարվել հրապարակել անունն ու կատարվածի մանրամասները: Իսկ բնակարանը, որը հրդեհել են, տուժածը վարձակալում էր: Նշենք նաեւ, որ հանցագործություն կատարած անձի ինքնությունը հայտնի է, նա փախուստի չի դիմել: Դեպքի առիթով նյութեր են նախապատրաստվում:
Փետրվարի 28-ին դոլարն ու եվրոն թուլացել են, ընդ որում եվրոպական արժույթը՝ ավելի քան 5 դրամով: Դոլարի փոխարժեքը կազմել է 480 դրամ, եվրոյինը՝ 587, ռուբլունը՝ 8 դրամ 55 լումա, ֆունտինը՝ 667 դրամ:
Մարտի 1-ի երեկոյան հանրապետության շրջանների զգալի մասում տեղումներ են սպասվում: Օդի ջերմաստիճանը մարտի 2-ին 4-5 աստիճանով կնվազի: Երեւանում նույնպես վաղը երեկոյան տեղումներ կլինեն, գիշերը՝ թաց ձյան եւ ձնախառն անձրեւի տեսքով: Մայրաքաղաքում գիշերը կդիտվի +2+4, ցերեկը՝ +15+17 աստիճան տաքություն:
