Ես պատիվ ունեմ ՀՀԿ-ի եւ ՀՅԴ-ի անունից ներկայացնելու հանրապետության նախագահի 4-րդ թեկնածուին: Այս մասին, այսօր՝ մարտի 1-ին, ԱԺ-ում հայտարարեց Վահրամ Բաղդասարյանը:
Նա հիշեցրեց, որ ՀՀԿ գործադիր մարմնի հունվարի 18-ի նիստում միաձայն առաջարկվել է ՀՀ նախագահի թեկնածու առաջադրել Արմեն Սարգսյանին: Այդ առաջարկը սկզբում Արմեն Սարգսյանին արել է ՀՀ նախագահ Սերժ Սարգսյանը, հետագայում ՀՅԴ-ն եւս կողմ է արտահայտվել այդ թեկնածությանը:
Վահրամ Բաղդասարյանը ներկայացրեց Արմեն Սարգսյանի կենսագրությունը՝ մեջբերելով ՀՀ նախագահ Սերժ Սարգսյանի խոսքը, ըստ որի ՀՀ նախագահ պետք է լինի մարդ, ոն անցած ճանապարհ ունի, ունի ճանաչում եւ երկրի ներսում, եւ դրսում, կարող է պատշաժ եւ արժանվույն ներկայացնել Հայաստանը արտերկրում, ապագա նախագահը պետք է տիրապետի օտար լեզուների, ունենա լայն կապեր եւ դրսում, եւ ներսում, եւ որ ամենակարեւորն է ՝ անկողմանակալ մարդ լինի, ով երբեք քաղաքականությամբ չի զբաղվել եւ կուսակցական չի եղել:
«Արմեն Սարգսյանն այդ մարդն է»,-ընդգծեց Բաղդասրյանը եւ կոչ արեց հարմար պահի փակ գաղտնի քվեարկությամբ կազմակերպել ընտրությունը եւ կողմ քվեարկել:
«Ելք» խմբակցության ղեկավար Նիկոլ Փաշինյանը նկատեց, որ ՀՀ նախագահին սահմանադրությամբ որոշակի պահանջներ են ներկայացված ՀՀ քաղաքացիության, վերջին տարիներին Հայաստանում մշտապես բնակվելու վերաբերյալ, սակայն այս պահին ներկայացված չեն դրանք հաստատող փաստաթղթեր:
«Մամուլում տպվել են բազմաթիվ հրապարակումներ, որոնք վկայում են, որ Արմեն Սարգսյանը մինչեւ 2014 թվականը եղել է Մեծ Բրիտանիայի քաղաքացի: Արմեն Սարգսյանը բանավոր պարզաբանումներ տվել է, բայց արդյոք մենք ձեռքի տակ ունենք պաշտոնական փաստաթուղթ, թե ե՞րբ է պարոն Սարգսյանը Մեծ Բրիտանիայի քաղաքացիությունից հրաժարվել, երբ է դրա մասին դիմում գրվել ու Բրիտանիայում ուժի մեջ մտել։ Այս պահին մեր ձեռքի տակ չկա փաստաթուղթ, որ Արմեն Սարգսյանը ՀՀ քաղաքացի է եղել և վերջին 6 տարում մշտապես բնակվել է ՀՀ-ում: Բանավոր հայտարարությունների ընթացակարգո՞վ ենք աշխատում»,- ասաց Փաշինյանը՝ հավելելով. «Մեզ տրվել է միայն կենսագրությունը, քաղաքացիության վերաբերյալ փաստաթուղթ քարտուղարությունը չի տրամադրել: Ես խնդրում եմ անհապաղ բերել այդ փաստաթղթերը, որ մենք ծանոթանանք»:
«Ելք» դաշինքից Արարատ Միրզոյանն էլ նշեց. «Բրիտանիայի դեսպանատունը ներկայացրել է տեղեկանք, որի համաձայն մի ՍՊԸ, որի անունը չեմ հիշում, որի տնօրեններից մեկը լինելու համար անհրաժեշտ է քաղաքացիություն եւ 2012-2014 թթ Արմեն Սարգսյանը եղել է տնօրեն ու ունեցել է Բրիտանիայի քաղաքացիություն»:
Ի պատասխան Վահրամ Բաղդասարյանն ասաց, որ այն, ինչ բանավոր հայտարարել է Արմեն Սարգսյանը՝ հիմնավորվել է փաստաթղթերով. «Մենք ստացել են կանոնակարգ օրենքով անհրաժեշտ բոլոր փաստաթղթերը: Կներկայացնենք այն փաստաթղթերը, որոնք նախատեսված են օրենքով, իսկ եթե կունենաք հարցեր, կարող եք հարցում անել եւ պատկան մարմինների կողմից ստանալ այդ հարցերի պատասխանը»:
ԱԺ փոխնախագահ Արփինե Հովհաննիսյանն էլ ընդգծեց, որ ԱԺ քարտուղարություն ներկայացված փաստաթղթերում առկա է պատկան մարմնի կողմից տրված տեղեկանք վերջին 6 տարում միայն ՀՀքաղաքացի հանդիսանալու եւ վերջին 6 տարում Հայաստանում բնակվելու տեղեկանք. «Իսկ եթե հետաքրքիր է, թե իրավասու մարմինն ինչի հիման վրա է այս տեղեկանքը տրամադրել, ապա պետք է դիմեք այդ մարմիններին, ոչ թե ԱԺ քարտուղարություն»:
Ավելի վաղ NEWS.am-ը հայտնել էր, որ այսօր ԱԺ-ում մեկնարկել է ՀՀ նախագահի ընտրության հարցի քննարկումը, իսկ քվեարկությունը տեղի կունենա վաղը՝ մարտի 2-ին:
