Մարդ չի կարող իրեն երջանիկ զգալ աղքատության պայմաններում: Այս մասին, այսօր՝ մարտի 1-ին, ԱԺ-ում իր ելույթում նշեց ՀՀ նախագահի թեկնածու Արմեն Սարգսյանը՝ հավելելով, որ սոցիալական անարդարության յուրաքանչյուր դեպքի մասին որեւէ տեղեկության նկատմամբ հասարակության արձագանքը շատ սուր է եւ դա պատահական չէ:
«Սոցիալական բեւեռացվածության բարձր մակարդակը, գործազրկությունը, անտարբերությունը, բյուրոկրատական քաշքշուկը մարդկանց դարձնում են թերահավատ եւ հեռացնում հասարակական գործընթացներից: Մարդ չի կարող իրեն երջանիկ զգալ աղքատության պայմաններում։ Ստեղծված իրավիճակի արմատական փոփոխությունը բոլորիս պարտքն է»:
Անդրադառնալով ժողովրդագրկան խնդիրներին, Արմեն Սարգսյանը նշեց, որ ցավոք, այսօր ունենք արտագաղթ, որը գերազանցում է ներքաղտը. «Բայց ներգաղթն ավելի լավ է, քան՝ արտագաղթը»:
«Այս 26 տարվա ընթացքում Հայաստանը կամաց-կամաց վերածվում է մի մեծ մայրաքաղաքի, Հայաստանը սկսում է սեղմվել դեպի Երեւան, իսկ Երեւանն էլ տնտեսական եւ զարգացման իմաստով՝ դեպի Երեւանի կենտրոն։ Սա մեծ եւ կարեւորագույն խնդիր է: Որեւէ լուծում, լինի հարկային արտոնություն, վարկային, արտոնություն, ազգային ծրագրեր, քաջալերում, բարեգործություն, քաջալերման կարիք ունի, որովհետեւ հեռավոր գյուղերը կարոտ են մեր ուշադրությանը եւ ծրագրերը պետք է համասեռ բաշխվեն», - ասաց Արմեն Սարգսյանը՝ նկատելով, որ այստեղ մեծ դեր ունի նաեւ սփյուռքը:
«Մեծ դեր ունենք նաեւ մենք, ինձ համար տարօրինակ պատճառներով մեր ազգային արժեքների գնահատման ճանապարհին շատ պարզ քայլեր, չգիտես ինչու, չենք կատարում: Հհաճախ են թվեր հրապարակվում, թե որքան տուրիստ է երկրից գնում Վրաստան, որոնք հարյուր հազարների են հասնում: Եվ կան թվեր, թե քանի տուրիստ է գնում Գյումրի, Վանաձոր կամ Արցախ։ Այդ թվերը հարյուր հազարներ չեն, խոսքը մի քանի տասնյակի մասին է։ Արցախը ոչ միայն ազգային արժանապատվության վայր է , այլեւ փայլուն երկիր, լավ ենթակառուցվանքերով, հյուրանոցներով: Չգիտես ինչու չենք այցելում Արցախ, չենք այցելում նաեւ Գյումրի, հեռավոր գյուղեր, որոնք ամեն մեկը հետաքրքիր է իր մշակույթով: Իտալիայում, օրինակ, Միլանի ժողովուրդը սիրում է իր հանգիստը Սիցիլիայում անցկացնել: Ինձ համար, օրինակ, Գյումրին շատ ավելի գեղեցիկ է, քան հին Թբիլիսին», - ընդգծեց ՀՀ նախագահի թեկնածուն:
Նշենք, որ այսօր ԱԺ-ում սկսվել է ՀՀ 4-րդ նախագահի ընտրության հարցի քնանրկումը, իսկ քվեարկությունը տեղի կունենա վաղը: