Ներդրումների համար պետք է պայմաններ լինեն, ոչ մեկը ներդրում չի անի իայն այն պատճառով, որ քո բարեկամն է: Այս մասին, այսօր՝ մարտի 1-ին, ԱԺ-ում իր ելույթում նշեց ՀՀ նախագահի թեկնածու Արմեն Սարգսյանը:
«Պայմանները հստակ են՝ կոռուպցիայի վերացումից մինչեւ մշակութային արդարություն, որովհետեւ Հայաստանը տարբերվում է շատ երկրներից: Շատ մեծ ընկերություններ ներդրում են անում այնտեղ, որտեղ բնական ռեսուրս կա, եւ կայուն է երկիրը: Կարեւոր է ռեսուրսը, իսկ երկիրը ժողովրդավար է, թե ոչ, կարեւոր չէ, իսկ Հայաստանում ներդրումը չի լինելու ռեսուրսային»,-ասաց Արմեն Սարգսյանը:
Նրա խոսքով, Հայաստանում պետք է բնապահպանությունը դարձնել կարեւորագույն խնդիր, եւ դա պետք է իրականանա նաեւ ԱԺ-ում. «Ցանկացած օրենք, որ ընդունվում է այստեղ, պետք է անցնի եւ կոռուպցիոն թեստ, եւ բնապահպանական թեստ եւ իրական կյանքի թեստ: Այսինքն չւնդունեք օրենքներ, որոնք պարզվի՝ ժամանակավրեպ են»:
Արմեն Սարգսյանը նկատեց, որ այսօր Հայաստանը դարձել է երկիր, որ արտահանում է նոր տեխնոլոգիաներ. «Հայաստանը նախկին ԽՍՀՄ երկրներում ամենաառաջադեմն է IT տեխնոլոգիաների առումով: Մեծ ներդրողները, որոնք գալիս են, պետք է տեսնեն, որ դատարանում իրենց իրավունքները պաշտպանված են լինելու: Նաեւ ներդրողը գալիս է այնտեղ, որտեղ մշակութային բավարարվածություն կարող է ստանալ: Պետք է լինի բարյացկամ վերաբերմունք ներդրողի նկատմամբ: Նոր տեխնոլոգիաներով ներդրողի համար հենց այդպիսի միջավայր է պետք, որովհետեւ նրանք ներդրում են անելու ոչ թե բնական ռեսուրսի մեջ, այլ մարդկանց մեջ»:
Նշենք, որ այսօր ԱԺ-ում սկսվել է ՀՀ 4-րդ նախագահի ընտրության հարցի քննարկումը, իսկ քվեարկությունը տեղի կունենա վաղը:
