Եթե ընտրվեմ ՀՀ նախագահ, իմ ողջ եռանդը, երկար տարիների փորձը, նվիրվածությունն ի սպաս եմ դնելու Հայաստանի Հանրապատության, Արցախի Հանրապետության եւ սփյուռքի ազգային խնդիրների լուծմանը: Այս մասին, այսօր՝ մարտի 1-ին, ԱԺ-ում իր ելույթում նշեց ՀՀ նախագահի թեկնածու Արմեն Սարգսյանը:
«Աշխատելու եւ փորձելու եմ ամեն ինչ անել, որպեսզի իմ գործունեությունը լինի Սահմանադրության սահմաններում, սակայն աշխատելու եմ իմ էության ողջ անկեղծությամբ եւ ազնվությամբ։ Լինելու եմ մեկը, որ ոչ միայն ՀՀ նախագահի պարտականություններն է կատարելու, այլ նաեւ կատարելու է ՀՀ քաղաքացու բարձրագույն պարտականությունը՝ լինելու նախեւառաջ այս երկրի քաղաքացի», - նշեց Արմեն Սարգսյանը։
«Փորձելու եմ լինել ոչ միայն այս խորհրդարանի, այլ՝ ՀՀ քաղաքացիների նախագահը։ Փորձելու եմ նաեւ ինչ-որ իմաստով լինել եւ ներկայացնել արցախահայության շահերը, ինչպես նաեւ իրենց բարոյական աջակցությունը կրող նախագահ, ինչպես նաեւ ողջ սփյուռքահայության նախագահը՝ նպատակ ունենալով իրականացնել ազգային միասնությունը եւ կրկին անգամ դարձնել մեր երկիրը մեկ ազգ, մեկ ժողովուրդ, մեկ ապագա ունեցող ազգ։ Փոքր պետություն՝ համաշխարհային ազգ։ Վստահ եմ, որ եթե մեր քայլերը ճիշտ կատարենք, ապա 21-րդ դարը մերն է լինելու», - եզրափակեց ՀՀ նախագահի թեկնածուն՝ հավելելով. «Մենք երիտասարդ հանրապետություն ենք եւ կերազեմ, որ հաջորդ 26 տարիները լինեն եւս երիտասարդ տարիներ»:
Նշենք, որ այսօր ԱԺ-ում սկսվել է ՀՀ 4-րդ նախագահի ընտրության հարցի քննարկումը, իսկ քվեարկությունը տեղի կունենա վաղը: