Ինձ առանձին դեպքերը չէ, որ զայրացնում է: Այս մասին, այսօր՝ մարտի 1-ին, ԱԺ-ում իր ելույթում նշեց ՀՀ նախագահի թեկնածու Արմեն Սարգսյանը՝ անդրադառնալով կոռուպցիայի դեմ պայքարին:
«Ելք» խմբակցության պատգամավոր Լենա Նազարյանը հարց ուղղեց Արմեն Սարգսյանին. «Կոռուպցիոն ո՞ր դեպքը ձեզ բարկացրեց, գուցե, որ ընտրակաշառքը է բաժանվել ՀՀԿ-ի կողմից, գուցե բարկացրել է այն, որ տարբեր պաշտոնյաներ, օֆշորներում ընկերություններ են գրանցում, բյուջեի հաշվին հարստանում են, կամ տեսել եք պաշտոնյաների հայտարարագրերը, շքեղ տներն ու մեքենաները: Ընդհանուր քննադատություններ շատերն են հնչեցնում, բայց քչերն են մատնացույց անում մեղավորներին»:
Ի պատասխան Արմեն Սարգսյանն ասաց. «Ինձ առանձին դեպք չի, որ զայրացնում եւ առանձին դեպքի վրա չէ, որ պետք է հիմնեմ իմ վերաբերմունքը: Ես լսեմ եմ այդ դեպքերի մասին, բայց դրանց մասին իրականության համար ես դատավոր չեմ: Իմ վերաբերմունքը ընդհանուր է, որովհետեւ տեսնում ու լսում եմ հարյուրավոր փոքր ու մեծ դեպքերի մասին: Չի կարող պատահել, որ կոռուպցիոն երեւույթներ չլինեն, եթե կան նմանատիպ ֆոն եւ հանրության վերաբերմունք կա, որն արտահայտվում է անտարբերությամբ, արտագաղթով:
Ես փորձում եմ մտածել, թե ինչ է պետք է անել, որ նման դեպքերը չլինեն: Ես դատավոր չեմ, որ պատժեմ: Բարձրագույն դատական խորհուրդը ճիշտ ճանապարհն է: Ընդունվել են նաեւ նոր օրենքներ. Կյանքը ցույց կտա, թե որքանով դրանք կաշխատեն: Կոռուպցիայի դեմ պայքարը պետք է լինի վերեւից ներքեւ»:
Նշենք, որ այսօր ԱԺ-ում սկսվել է ՀՀ 4-րդ նախագահի ընտրության հարցի քննարկումը, իսկ քվեարկությունը տեղի կունենա վաղը:
