Հնարավոր է՝ 20-30 տարի իշխանության մեջ եղած մարդիկ բացթողումներ են ունեցել: Այս մասին այսօր՝ մարտի 1-ին խորհրդարանում լրագրողների հետ զրույցում ասել է ԱԺ ՀՀԿ խմբակցության ղեկավար Վահրամ Բաղդասարյանը՝ անդրադառնալով նախագահի թեկնածու Արմեն Սարգսյանի այն հայտարարությանը, թե իշխանությունները մեղավոր են «բեռլինյան պատեր» կառուցելու, անհանդուրժողականությունը մեծացնելու, սոցիալական լարվածությունը խորացնելու մեջ:
Հարցին՝ Արմեն Սարգսյանի մեղադրանքն արդյո՞ք ուղղված է ՀՀԿ-ին, որը 20 տարի է՝ իշխում է, Վահրամ Բաղդասարյանը պատասխանել է. «Մենք քննադատությունից չենք խուսափում, քաղաքական զարգացումներն առաջ են ընթանում: Հնարավոր է՝ 20-30 տարի առաջ իշխանության մեջ եղած մարդիկ բացթողումներ են ունեցել: Գուցե ՀՀԿ-ն է եղել, բայց 90-ականներին ՀՀԿ-ն կոալիցիայի մաս չի կազմել»:
Վահրամ Բաղդասարյանի խոսքով՝ ամոթ չէ սխալներն ընդունելը, բայց պետք է լինեն կոնկրետ փաստեր, որ դրանց արձագանք լինի. «1990-ականներին իշխանության գլուխը ՀՀԿ-ն չի եղել եւ չի կրել պատասխանատվությունը»:
Հարցին՝ ինչո՞ւ է կարծում, որ Արմեն Սարգսյանը հենց 90-ականները նկատի ունի, ՀՀԿ խմբակցության ղեկավարը նշել է. «20 տարի ՀՀԿ-ն իշխանության մեջ է ու աստիճանաբար բարեփոխումներ է կատարում, որոնք հիմնադրման բացթողումներն են: Մենք չենք մեղադրում հիմնադիր քաղաքական ուժերին, որովհետեւ այն ժամանակ հնարավոր չէր սոցիալիստական երկրից դառնալ կապիտալիստական»:
Ըստ Բաղդասարյանի՝ Արմեն Սարգսյանը բոլորի նախագահն է լինելու, անկուսակցական է եւ նման ելույթով ամենեւին ՀՀԿ-ին զատելու մտքեր չունի: Արմեն Սարգսյանը կիսելո՞ւ է ՀՀԿ-ի աշխատանքի պատասխանատվությունը հարցին էլ պատգամավորը պատասխանել է, որ նախագահը պետք է կրի պատասխանատվություն:
