Հայաստանի Հանրապետության վարչապետ Կարեն Կարապետյանը մարտի 1-ին կառավարության նիստի ժամանակ 2018 թվականին զբոսաշրջիկների ներհոսքի աճի կապակցությամբ համապատասխան ստորաբաժանումներին հանձնարարել է նախապատրաստել Գյումրի քաղաքի «Շիրակ» միջազգային օդանավակայան եւ Երեւանի «Զվարթնոց» օդանավակայան տանող ճանապարհների բարելավման աշխատանքների պլանը:
Մասնավորապես, ՀՀ ֆինանսների նախարար Վարդան Արամյանին, քաղաքաշինության պետական կոմիտեի նախագահ Նարեկ Սարգսյանին եւ Երեւանի քաղաքապետ Տարոն Մարգարյանին առաջարկվել է մեկ ամսվա ընթացքում «Զվարթնոց» օդանավակայանից դեպի Երեւան տանող ճանապարհի եւ հարակից տարածքների բարելավման, խորհրդանիշների տեղադրման վերաբերյալ համատեղ լուծումներ մշակել եւ ներկայացնել, ինչպես նաեւ՝ նախագծային փաստաթղթեր, այդ թվում նաեւ՝ անհրաժեշտ ծախսերի մասով:
Գյումրիի քաղաքապետ Սամվել Բալասանյանին առաջարկվել է «Կումայրի վերածնունդ» ոչ հրապարակային պայմանագրային մասնագիտացված ներդրումային ֆոնդի հետ համատեղ երկու ամսվա ընթացքում ապահովել «Շիրակ» օդանավակայանից դեպի Գյումրի, ինչպես նաեւ դեպի Երեւան տանող ճանապարհների բարելավումը եւ կանաչապատումը:
