Կառավարությունը մարտի 1-ի նիստում հավանություն տվեց «Ապահովագրության եւ ապահովագրական գործունեության մասին», «Գրավատների եւ գրավատնային գործունեության մասին», «Վճարահաշվարկային համակարգերի եւ կազմակերպությունների մասին», «Արժութային կարգավորման եւ արժութային վերահսկողության մասին» օրենքներում փոփոխություններ կատարելու մասին» օրինագծերի փաթեթին: Փաթեթը ներկայացրեց Կենտրոնական բանկի նախագահ Արթուր Ջավադյանը:
Նրա խոսքով՝ այս օրինագծի նպատակն է ֆինանսական հաստատություններ հանցագործությունների համար դատապարտված անձանց մուտքի եւ այդ կազմակերպությունների կապիտալում նշանակալի մասնակցության կանխարգելումը: «Ներկայումս Հայաստանում բացակայում են պատշաճ իրավական կամ նորմատիվային միջոցառումները, որոնք կկանխեն հանցագործների կամ նրանց հետ կապակցված անձանց նշանակալի մասնակցությունը ֆինանսական հաստատությունների կապիտալում, կամ նրանց կողմից բաժնետոմսերի հսկիչ փաթեթի տնօրինումը»,- նշեց ԿԲ ղեկավարը՝ շարունակելով, որ նաեւ նախատեսված չեն միջոցառումներ՝ ուղղված ֆինանսական կազմակերպությունների կապիտալում նման անձանց՝ որպես շահառու փաստացի մասնակցության կամ կառավարչական կազմում մասնակցության բացառմանը: