Երեւանի Ազատության հրապարակում մեկնարկել է Հայ ազգային կոնգրեսի եւ Հայաստանի ժողովրդական կուսակցության հրավիրած հավաքը՝ ի հիշատակ տասը տարի առաջ կատարված ողբերգական իրադարձությունների։ Հավաքի մասնակիցները երթով գնալու են Մյասնիկյանի արձանի մոտ՝ հարգանքի տուրք մատուցելու զոհվածների հիշատակին (ֆոտոռեպորտաժ)։

NEWS.am-ի թղթակիցը հայտնում է, որ հավաքին չի մասնակցում ՀՀ առաջին նախագահ Լեւոն Տեր-Պետրոսյանը։

ՀԱԿ/ՀԺԿ-ի հավաքին մասնակցում են նաեւ «Ելք» ընդդիմադիր խմբակցության պատգամավորներն ու համակիրները։

Նշենք, որ 10 տարի առաջ Երեւանի կենտրոնում ողբերգական իրադարձություններ տեղի ունեցան, որի հետեւանքով զոհվեց 10 քաղաքացի:

2008թ. փետրվարի 18-ի նախագահական ընտրություններից հետո ՀՀ առաջին նախագահ Լեւոն Տեր-Պետրոսյանի կողմնակիցները հավաքվել էին Ազատության հրապարակում եւ պահանջում էին ընտրությունների արդյունքների վերանայում: Նրանք 10 օր շարունակ շուրջօրյա հանրահավաքներ էին անցկացնում Ազատության հրապարակում:

Մարտի 1-ի առավոտյան ոստիկանությունը ուժով ցրեց Ազատության հրապարակում հավաքվածներին: Մարդիկ սկսեցին հավաքվել Մյասնիկյանի արձանի մոտ: Նույն օրը երեկոյան երկրի նախագահ Ռոբերտ Քոչարյանն արտակարգ դրություն հայտարարեց, ապա ուժային կառույցները հրազեն կիրառեցին անզեն ցուցարարների դեմ, որի հետեւանքով զոհվեց 10 քաղաքացի, այդ թվում երկու ոստիկան, եւս 200 մարդ տարբեր աստիճանի վնասվածքներ ստացան:

10 զոհերի անուններն են՝ Գոռ Քլոյան, Դավիթ Պետրոսյան, Տիգրան Աբգարյան, Տիգրան Խաչատրյան, Արմեն Ֆարմանյան, Հովհաննես Հովհաննիսյան, Համլետ Թադեւոսյան, Գրիգոր Գեւորգյան, Սամվել Հարությունյան, Զաքար Հովհաննիսյան: