Եթե նախագահի թեկնածուին քվեարկած դեմերը, սպասվածից ավել է երեքով, սարսափելի չէ։ Այս մասին NEWS.am–ի հետ զրույցում ասաց ՀՀԿ խմբակցության պատգամավոր Սամվել Նիկոյանը։
Նշենք, որ Արմեն Սարգսյանն այսօր Ազգային ժողովի կողմից ընտրվեց 4–րդ նախագահ 90 կողմ եւ 10 դեմ ձայների հարաբերակցությամբ, մինչդեռ ՀՀԿ, ՀՅԴ, «Ծառուկյան» խմբակցությունները հայտարարել են, որ միաձայն կողմ են քվեարկելու Արմեն Սարգսյանին։ Ընտրությանը մասնակցել է 101 պատգամավոր։ Մեկ քվեաթերթիկն անվավեր է համարվել։ Թե ինչու է անվավեր համարվել, Հաշվիչ հանձնաժողովի անդամները խիստ գաղտնի են պահում։ «Ելք» դաշինքը հայտարարել էր, որ դեմ է քվեարկելու, իսկ ընտրությանը մասնակցել է 7 պատգամավոր։ Ստացվում է ՝ 3 դեմ–ը մյուս խմբակցություններից են, սակայն ՀՀԿ, ՀՅԴ, «Ծառուկյան» խմբակցություններից վստահեցնում են, թե իրենց թիմից չէ։ Սամվել Նիկոյանը այսպսի պնում չարեց, նա ասաց՝ փակ քվեարկությունը հենց դրա համար է, որ յուրաքանչյուրը քվեարկի՝ ինչպե սուզում է՝ անկախ խմբակցության որոշումից։
«Փակ քվեարկության իմաստը այն է, որ ովքեր հրապարակային ինչ հայտարարում են, բայց միեւնույն է իրենք իրավունք ունեն գնալ եւ քվեարկել ազատորեն, գաղտնի ինչպես իրենք են կամենում։ Փակ քվեարկության իմաստը դա է։ Սովորական ընտրությունների ժամանակ թեկնածուները շատ են, բայց քաղաքացիները մի քնաի թեկնածուի խոստանում են իրենց օգտին քվերակեն։ Մարդիկ կան, որ քվեարկել են ոչ այնպես, ինչպես հայտարարվել է իրենց խմբակցությունում»,–ասաց Սամվել Նիկոյանը։
Հարցին՝ բացառո՞ւմ է, որ ՀՀԿ–ից չեն այդ անսպասելի «դեմերը», պատասխանեց. «Եթե ասեմ՝ վստահեցնում եմ, որ ՀՀԿ–ից չէ, դա բավարարո՞ւմ է։ Փակ քվեարկությունը նրա համար է, որ յուրաքանչյուր պատգամավոր ազատորեն քվեարկի այնպես, ինչպես ինքն է ցանկանում։ Եթե կանխատեսածից 3 դեմ ավել է եղել, սարսափելի չէ, նորմալ է»։
