Արարատի եւ Վայոց Ձորի մարզերի ընդհանուր իրավասության դատարանում զինծառայող Սուրեն Մոսիյանի մահվան գործով կհարցաքննվի դատաբժշկական եւ ռազմաբժշկական հանձնաժողովի սրտաբանն ու փորձագետ Գագիկ Հարությունյանը: NEWS.am-ի հետ զրույցում մահացած զինծառայողի իրավահաջորդի ներկայացուցիչ Անի Չատինյանը նշեց, որ սրտաբանի եւ փորձագետի հարցաքննությունից հետո կհայտարարվի դատաքննության ավարտ:
Սուրեն Մոսիյանը մահացել է 2016 թ. մայիսի 29-ին. մարտական ծառայություն իրականացնելիս ինքնազգացողությունը վատացել է, եւ հոսպիտալ տեղափոխելու ճանապարհին մահացել:
Քրեական գործով նշանակված դատաբժշկական եւ ռազմաբժշկական համալիր փորձաքննությունների հիման վրա Արտաշատի տարածքային զորակոչային հանձնաժողովի սրտաբանին մեղադրանք է առաջադրվել:
Փորձագիտական եզրակացության համաձայն՝ սրտաբան Սեդա Թադեւոսյանը կարող էր կանխատեսել այդ հիվանդությունը չբուժելու արդյունքում հնարավոր բացասական ելքերի, այդ թվում՝ մահվան առաջացումը:
Արարատի եւ Վայոց Ձորի մարզերի ընդհանուր իրավասության դատարանում կայացած դատական նիստերի ընթացքում հարցաքննվել են զորակոչային հանձնաժողովում ընդգրկված բժիշկները: Նրանց մի մասը պնդել է, թե Սուրեն Մոսիյանի մոտ արձանագրված 110 զարկը նորմայից շեղում չի համարվում, մյուսները` հակառակը: