Թուրքիան սկսեց Աֆրինի գործողությունները միջազգային հանրության ուշադրությունը Կիպրոսի հյուսիսում տեղի ուենցող իրադարձություններից շեղելու համար։ Այս մասին մարտի 3-ին՝ լրագրողների հետ հանդիպման ժամանակ կարծիք է հայտնել ԱԺ պատգամավոր Կարեն Բեքարյանը։
Այսպես, պատգամավորի կարծիքով, Կիպրոսն Անկարայի համար ավելի մեծ նշանակություն ունի, քան Աֆրինը։
«Թուրքիան այդ գործողություններն իրականացնում է միջազգային հանրության ուշադրությունը Հյուսիսային Կիպրոսում շելֆի հետազոտություններից շեղելու համար»,–պարզաբանել է պատգամավորը։
Դրա հետ մեկտեղ, Բեքարյանը նշել, որ Անկարան կբախվի Հունաստանի հետ, որը եւս հավակնություններ ունի այդ շելֆի նկատմամբ եւ Թուրքիայի հետ վիճարկում է այն հետազոտելու իրավունքը։ Այսպիսով, պատգամավորի կարծիքով,ուշադրությունը այդ հարցից շեղելու համար Թուրքիան գնաց արմատական քայլի եւ նախաձեռնեց Աֆրինի ռազմական գործողությունները, որը խաղաղ բնակչության շրջանում զգալի զոհերի հանգեցրեց։
Բեքարյանը նաեւ համոզված է, որ Թուրքիան պարբերաբար փորձելու է այս հարցով մանեւրել՝ շարունակելով իր գործունեության հիմնական ուղղություններից ուշադրություն շեղելու քաղաքականությունը։ Սա, ըստ փորձագետի, կապված է նաեւ հարեւանների հետ ունեցած լարված հարաբերություններով, որն էլ ավելացրել է խնդիրների թիվը, որն Անկարան ստիպված է լուծել։
«Նա միշտ փորձել է ցուցադրել կառուցողականություն՝ այդպիսով, շեղելով ուշադրությունը իր հիմնական նպատակներից ու խնդիրներից»,–շեշտել է Բեքարյանը։
Մեկնաբանելով Թուրքիայում մարդու իրավունքների իրավիճակը՝ նա նշել է, որ դրա մասին խոսելը ծիծաղելի է, քանի որ Թուրքիայում մարդու եւ քաղաքացու իրավունքները չեն պահպանվում, ավելին՝ այս երկիրը հսկայական հետընթաց է գրանցել այդ հարցով։ Նրա խոսքով, Թուրքիայում տեղի ունեցող վերափոխումներն այդ երկիրն ու հասարակությունն ավելի ու ավելի են հեռացնում Եվրոպայից եւ եվրոպական արժեքներից:
