Թուրքիան ցույց տվեց իր իրական դեմքը, եւ այն շատ հեռու է քաղաքակիրթ երկրներից: Այս մասին փետրվարի 5-ին Ազգային ժողովում տեղի ունեցած ավանդական ճեպազրույցների ժամանակ հայտարարեց ՀՅԴ խորհրդարանական խմբակցության ղեկավար Արմեն Ռուստամյանը:
Նրա կարծիքով՝ Թուրքիայի հետ որեւէ հարաբերություն չի կարելի կառուցել, քանի որ այս երկիրն իրեն չափազանց ապակառուցողական է պահում: «Անկարան շարունակում է Օսմանյան Թուրքիայի քաղաքականությունը, եւ այն, որ նրանք փոխվել են, սխալ կարծիք է: Մենք կրկին անգամ համոզվեցինք, թե ում հետ գործ ունենք»,- ընդգծեց Ռուստամյանը: Ինչպես նշեց ՀՅԴ ներկայացուցիչը, հայկական կողմը մեծ զիջումների է գնացել Անկարայի հետ, քանի որ նախապայմաններ չի առաջադրել Հայոց ցեղասպանության ճանաչման տեսքով եւ պատրաստ էր հավասար պայմաններով բաց բանակցություններ վարել:
Հիշեցնենք, որ Հայաստանի Հանրապետության նախագահ Սերժ Սարգսյանը հրամանագիր է ստորագրել, որով չեղյալ է հայտարարել հայ-թուրքական արձանագրությունները: ՀՅԴ-ն միշտ դեմ է հանդես եկել դրանց ստորագրմանը:
