«Միասնական ազգային շարժում» կուսակցությունը պետք է միավորվի մյուս ընդդիմադիր ուժերի հետ նախագահական ընտրություններում հաղթանակ տանելու եւ «Վրացական երազանք»-ին իշխանությունից հեռացնելու համար։ Այս մասին հայտարարել է Վրաստանի նախկին նախագահ Միխայիլ Սաակաշվիլին՝ Ամստերդամից իր համախոհներին ուղղված տեսաուղերձում։
«Վրաստանը մեծ վտանգի առաջ է կանգնած։ Այս պայմաններում Իվանիշվիլին (Վրաստանի նախկին վարչապետ, միլիարդատեր Բիձինա Իվանիշվիլին) փաստացիորեն գլխավոր ընդդիմադիր ուժի քասթինգ է հայտարարել։ Նրանք բախվում եւ պայքարում են ընտրությունների երկրորդ տեղի համար եւ գոհ են այդ արժանապատիվ կոչման համար։ Կներեք, բայց պետք չէ։ Մեր խնդիրն է կրկին դառնալ Վրաստանի իշխանություն եւ մենք կվերադառնանք արդեն 2018 թվականին։ Ինչպե՞ս է պետք դա անել։ Մենք պետք է հաղթանակ տանենք նախագահական ընտրություններում եւ կործանենք Իվանիշվիլիի կառավարությունը»,-հայտարարել է նա։
Նրա համոզմամբ՝իր նկարագրած սցենարն իրական խնդիր է, քանի որ Իվանաշվիլին թուլացել է, իսկ ժողովուրդը վրդովված է։ Սաակաշվիլիի կարծիքով, ընտրական քարոզարշավին նոր դեմքեր պետք է ներգրավվեն, հատկապես երիտասարդությունից։
