Թեհրանն իր հրթիռային հնարավորությունները կավելացնի պաշտպանական ռազմավարության շրջանակում, որի վրա քաղաքական գործոնները չեն անդրադառնա: Այս մասին հայտարարել է Իրանի Ազգային անվտանգության բարձրագույն խորհրդի քարտուղար Ալի Շամհանին Թեհրանում Ֆրանսիայի ԱԳ նախարար Ժան-Իվ Լե Դրիանի հետ հանդիպման ժամանակ, փոխանցում է Tasnim-ը:
Շամհանին Իրանի պաշտպանական ուժը, մասնավորապես հրթիռային ծրագիրը, զսպման քաղաքականության համաձայն «անխուսափելի անհրաժեշտություն» է որակել: «Իրանի պաշտպանական հզորությունը որեւէ երկրի սպառնալիք չի ներկայացնում, եւ դրա ամրապնդումը կախված է անվտանգության պահանջմունքներից ու պոտենցիալ սպառնալիքներին հակազդելու անհրաժեշտությունից»,- հավելել է նա:
Նա Եվրոպային հորդորել է արագացնել Գործողությունների համատեղ համապարփակ ծրագրի իրականացումը: Շամհանին քննադատել է Եվրոպայի «սխալ» քաղաքականությունը, որն ԱՄՆ-ին զիջումների է գնում, որպեսզի նա մնա միջուկային գործարքի մեջ:
Ֆրանսիայի ԱԳ նախարարն իր հերթին Իրանին գովաբանել է ԳՀՀԾ-ին իր հավատարմության համար՝ հայտարարելով, որ Ֆրանսիան հանդես է գալիս միջուկային համաձայնագրի հարցում ԱՄՆ դիրքորոշման դեմ: Մատնացույց անելով Թեհրանի եւ Փարիզի քաղաքական եւ տնտեսական հեռանկարները՝ ԳՀՀԾ
-ն հաշվի առնելով, Լե Դրիանն ասել է, որ առաջիկայում կհրապարակվեն Ֆրանսիայի եւ Իրանի միջեւ արժութային եւ բանկային փոխգործակցության խթանման նոր ծրագրերը: