Դաշնակցությունը չի բացառում վարչապետի պաշտոնում Սերժ Սարգսյանի առաջադրման հնարավորությունը: Այսօր խորհրդարանական ճեպազրույցների ժամանակ Արմեն Ռուստամյանն ասել է՝ քաղաքականության մեջ ոչինչ բացառել չի կարելի: Իսկ վարչապետի թեկնածուի հարցով խորհրդակցությունները կոալիցիոն կուսակցությունները կանցկացնեն մինչեւ ապրիլի 9-ը: Վահրամ Բաղդասարյանին էլ լրագրողները հիշեցրել են Սերժ Սարգսյանի հայտարարությունը, որ Սահմանադրության փոփոխություններից հետո չի պատրաստվում առաջադրվել վարչապետի պաշտոնում: Հանրապետական խմբակցության ղեկավարն ասել է՝ քաղաքականության մեջ ամեն օր ինչ-որ բան է փոխվում, եւ լրագրողներին խորհուրդ է տվել կարդալ Չերչիլի կենսագրությունը:

«Ելք»-ը դեռ չի որոշել ցույցի դուրս գալու հարցը, եթե Սերժ Սարգսյանն առաջադրվի վարչապետի պաշտոնում: Նիկոլ Փաշինյանը որոշման կայացումը ժողովրդին է թողնում, բայց եթե ժողովուրդը որոշի, երաշխավորում է, որ կլինի իշխանափոխություն:

Մահացել է Հայաստանի գլխավոր ինֆեկցիոնիստ, Նորքի Ինֆեկցիոն կլինիկական հիվանդանոցի տնօրեն Արա Ասոյանը: Նա 65 տարեկան էր: Ասոյանը մահացել է հիվանդանոցի բակում: Պատճառը սրտի կաթվածն է: Նրան տեղափոխել են վերակենդանացման բաժանմունք, բայց բժշկի կյանքը փրկել չի հաջողվել:

Այսօր հրապարակվել է հայտնի էքստրասենս Անի Մաջնունյանի սպանության գործով դատավճիռը: Հանցագործության մեջ մեղադրվող Մուշեղ Մխիթարյանը դատապարտվել է 20 տարի ժամկետով ազատազրկման: 26-ամյա դերասանը դատավճիռը լսել է արցունքն աչքերին: Նշենք, որ 53-ամյա Անի Մաջնունյանը սպանվել է 2015 թվականի օգոստոսի 5-ին. Մխիթարյանը նրան դանակի 59 հարված է հասցրել: Ըստ մեղադրանքի՝ երիտասարդը Մաջնունյանին սպանել է տանը եղած գումարը հափշտակելու համար: Մուշեղ Մխիթարյանը մինչեւ վերջ չի ընդունել իրեն առաջադրված մեղադրանքը:

Պաշտպանության նախարարության աշխատակիցը ոչ սթափ վիճակում մեքենայով հարվածել է Գագիկ Ծառուկյանի հոր մեքենային: Երեւան-Սեւան ավտոճանապարհին՝ «Մուլտի Լեոն» բենզալցակայանի դիմաց, բախվել են Volkswagen եւ Toyota Land Cruiser մակնիշների մեքենաները: Պատահարի հետեւանքով Volkswagen-ի ուղեւորը մարմնական վնասվածքներով հիվանդանոց է տեղափոխվել: Ըստ տեղեկությունների՝ Volkswagen-ի վարորդը պաշտպանության նախարարության աշխատակից է, 32-ամյա Էրիկ Պետրոսյանը, իսկ Toyota Land Cruiser-ը պատկանում է Ծառուկյանի հորը՝ Նիկոլայ Ծառուկյանին: Պատահարի պահին նա մեքենայում չի եղել: 

Քսենիա Սոբչակը հայտարարել է, որ իր վրա հարձակվել են: «Քաղաքացիական նախաձեռնություն» կուսակցությունից Ռուսաստանի նախագահի թեկնածուն հայտնել է, որ մի տղամարդ հարձակվել ու ինչ-որ հեղուկ է լցրել իր վրա: Սոբչակի խոսքով՝ նա նաեւ բղավել է. «Սա Ժիրինովսկու համար»: Իսկ Սոբչակի եւ Ժիրինովսկու միջեւ միջադեպ էր տեղի ունեցել ռուսական հեռուստաալիքներից մեկի ուղիղ եթերում: Նախընտրական հեռուստաբանավեճի ժամանակ Վլադիմիր Ժիրինովսկին վիրավորել էր Սոբչակին՝ անպարկեշտ արտահայտություններով փորձելով լռեցնել, ի պատասխան՝ հաղորդավարը ջուր էր լցրել քաղաքական գործչի վրա:

Մաշտոցի պողոտայում շաբաթ տեղի ունեցած խոշոր հրդեհը, նախնական տվյալներով, առաջացել է անօթեւանների անզգուշության պատճառով: Փորձաքննություն է կատարվում, սակայն ԱԻՆ-ի նախնական տվյալներով, անօթեւաններն այրել են գետնանցումի տարածքում կուտակված կենցաղային աղբը: Նշենք, որ հրդեհը բռնկվել էր «Մետրոպոլ» հյուրանոցի մոտակայքում, գետնանցումի չգործող խանութում: Հրդեհի բարդությա «բիս 1» աստիճան էր հայտարարվել: Հավելենք նաեւ, որ գետնանցումի հարակից թունելը ժամանակավորապես փակ է. այստեղ շինարարական աշխատանքներ են:

Տեղի է ունեցել «Օսկար» մրցանակաբաշխության 90-րդ արարողությունը: Այս տարի լավագույն ֆիլմ է ճանաչվել «Ջրի ձեւը» ժապավենը, «Լավագույն ռեժիսոր» անվանակարգում հաղթել է մեքսիկացի Գիլյերմո դել Տորոն: «Լավագույն դերասանուհի» է ճանաչվել Ֆրենսիս ՄակԴորմանդը, իսկ «Լավագույն դերասան»՝ «Մութ ժամանակներ» ֆիլմում Չերչիլին մարմնավորած Գարի Օլդմանը: Դերասանը բեմից դիմել է 98-ամյա մորը՝ կոչ անելով միացնել թեյնիկը: «Ես «Օսկար» եմ բերում տուն»,- հավելել է դերասանը: «Լավագույն օտարերկրյա» ֆիլմ անվանակարգում էլ հաղթող է ճանաչվել «Ֆանտաստիկ կինը» դրաման, որը պատմում է տրանսսեքսուալ կնոջ մասին: Ի դեպ՝ «Օսկար 2018»-ի «թրենդը» ոսկեգույնն ու արծաթագույնն էին. աստղերի մեծ մասը ներկայացել է այս երանգների զգեստներով:

Տեղի է ունեցել Հայոց ցեղասպանության մասին «Ժխտման ճարտարապետները» վավերագրական ֆիլմի երեւանյան պրեմիերան: Այս առիթով Հայաստան են ժամանել նաեւ ֆիլմի պրոդյուսերներ Դին Քեյնն ու Մոնթել Ուիլյամսը: Հայոց ցեղասպանության մասին Քեյնն իմացել է դեռ ուսանության տարիներին, համալսարանական ընկերոջից՝ Քեւին Մաթոսյանից: Հայտնի դերասանը նաեւ կարծում է, որ քանի դեռ չի ճանաչվել Հայոց ցեղասպանությունը, Արցախում տիրող լարվածությունը նույնպես կարող է վերածվել զանգվածային ցեղասպանության: Իսկ «Էմմիի» դափնեկիր Մոնթել Ուիլյամսը 1915 թվականի դեպքերի մասին բոլորովին վերջերս է իմացել, երբ Դին Քեյնը նրան պատմել է այդ թեմայով վավերագրական ֆիլմ նկարահանելու մտադրության մասին: Նա ռազմական պատմաբան է, երկար տարիներ աշխատել է ամերիկյան բանակում, եւ զարմացել է, որ երբեք չէր լսել հայերի ցեղասպանության մասին: Հավելենք, որ հեղինակները ֆիլմն «Էմմիի» առաջադրելու հայտ են ներկայացրել: Մարտի երկրորդ կեսին հայտնի կդառնա, արդյո՞ք «Ժխտման ճարտարապետները» կներառվի մրցանակաբաշխության շորթ-լիստում:

Մարտի 5-ին դոլարը կայուն է եղել, եվրոն թանկացել է եւս 2 դրամով: Դոլարի փոխարժեքը կազմել է 480 դրամ, եվրոյինը՝ 592, ռուբլունը՝ 8 դրամ 43 լումա, ֆունտինը՝ 664 դրամ:

Մարտի 6-ին կեսօրից հետո հանրապետության շրջանների զգալի մասում տեղումներ են սպասվում: Օդի ջերմաստիճանը մի քանի մարզերում եւ Արցախում 8-10 աստիճանով կնվազի: Երեւանում նույնպես ժամանակ առ ժամանակ տեղումներ են սպասվում: Մայրաքաղաքում գիշերը կդիտվի +4+6, ցերեկը՝ +13+15 աստիճան տաքություն: