Գերմանական Frankfurter Allgemeine Zeitung թերթին տված հարցազրույցում շախմատի աշխարհի 13-րդ չեմպիոն Գարի Կասպարովը, խոսելով շախմատի մասին, Հայաստանն ու Ադրբեջանը համեմատել է Խորհրդային Միության հետ:
Frankfurter Allgemeine Zeitung. Ինչո՞ւ Ռուսաստանը չնայած կառավարության աջակցությանը այլեւս չունի շախմատի չեմպիոնական տիտղոս:
ԳարիԿասպարով. Կիրք չկա: Խոսքը ոչ թե տաղանդների աջակցության, այլ` իշխանության եւ բիզնեսի մասին է: 8-ից 18 տարեկանների աշխարհի առաջնություններում Ռուսաստանը բոլորից շատ հավակնորդ է ներկայացնում, սակայն ոչ մի անգամ ոսկե մեդալ չի նվաճել: Ադրբեջանը երեքն է նվաճել: Չի կարելի է շախմատի զարգացումը կտրել երկրի զարգացումից: Մեր կառավարությունը քամահրում է ինտելեկտը: Խորհրդային Միությունը թեեւ լավ քաղաքական համակարգ չէր, սակայն երկրում շախմատի զարգացման համար տրամադրվում էին միջոցներ, քանի որ այս խաղը գաղափարախոսական զենք էր, նաեւ ինտելեկտի զարգացման գործիք էր: Երեխաների համար այլ հնարավորություններ քիչ կային: Շախմատը դիտարկվում էր ապագա ունեցող մի բան: Այսօր Ադրբեջանում եւ Հայաստանում նման իրավիճակ է:
