ԱՄՆ փոխնախագահ Մայքլ Փենսը, ելույթ ունենալով հասարակայնության հետ կապերի իսրայելա-ամերիկյան կոմիտեի նիստին, հայտարարել է, որ Վաշինգտոնը թույլ չի տա իրանական միջուկային զենք ստեղծել, հայտնում է «ՌԲԿ»-ն՝ վկայակոչելով Times of Israel-ը:
«ԱՄՆ-ն երբեք թույլ չի տա Իրանին տիրանալ միջուկային զենքին»,- ասել է նա: ԱՄՆ փոխնախագահի խոսքով՝ Իրանը շարունակում է բալիստիկ հրթիռներ մշակել, ինչպես նաեւ աջակցություն է ցուցաբերում ահաբեկչությանը:
Փենսը ընդգծել է, որ ԱՄՆ նախագահ Դոնալդ Թրամփը դեռ չի սկսել նոր պատժամիջոցներ կիրառել Թեհրանի նկատմամաբ, որպեսզի հնարավորություն ընձեռի կարգավորել միջուկային գործարքում առկա տարաձայնությունները: Ընդ որում, Փենսը հավելել է, որ ԱՄՆ-ն եւ եվրոպական երկրները նման զիջողություններ թույլ չեն տա: «Չսխալվեք, սա նրանց վերջին հնարավորությունն է: Եթե Իրանի միջուկային գործարքը մոտակա ամիսներին չվերանայվի, ապա ԱՄՆ-ն անմիջապես դուրս կգա դրանից», - եզրափակել է Փենսը: