Եվրահանձնաժողովը եվրոպական արդյունաբերությունը պաշտպանելու միջոցներ ձեռք կառնի, եթե ԱՄՆ–ն պղնձի եւ ալյումինի ներմուծման մաքսատուրքեր մտցնի։ Այս մասին հայտարարել է Եվրահանձնաժողովի նախագահի առաջին տեղակալ Ֆրանս Տիմերմանսը Europe 1 ռադիոկայանին տված հարցազրույցում։
«Եթե ԱՄՆ-ն պրոտեկցիոնիստական միջոցներ մտցնի, Եվրամիությունը կպաշտպանի իր արդյունաբերությունը համարժեք ձեւով։ Մեր ուղերձը Վաշինգթոն հստակ է՝ պետք չէ դա անել: Բայց եթե, այնուամենայնիվ, դա արվի, ապա մենք կարձագանքենք»,–ասել է նա։
Նա նշել է, որ «Եվրոպական հանձնաժողովի արձագանքը կլինի ամերիկյան գործողություններին համաչափ»: Ըստ Թիմերմանսի՝ ԵՀ-ն «պատրաստ է գործել արագ եւ վճռական»:
Հիշեցնենք, որ մարտի 1-ին Դոնալդ Թրամփը հայտարարել էր, որ գալիք շաբաթ ԱՄՆ-ն մաքսատուքեր կմտցնի պղնձի եւ ալյումինի ներմուծման համար: Դրանց չափը պողպատի համար 25 տոկոս կկազմի, իսկ ալյումինի համար՝ 10 տոկոս:
Մեկնաբանելով այս հայտարարությունները՝ Ֆրանսիայի էկոնոմիկայի եւ ֆինանսների նախարար Բրյունո Լե Մերը նշել է, որ հայտարարված ծրագրերը անընդունելի է համարում: Նրա խոսքով, դրանք «զգալի ազդեցություն կունենան եվրոպական տնտեսության եւ ֆրանսիական ընկերությունների վրա»: Նախարարը զգուշացրել է, որ «առեւտրային պատերազմում միայն պարտվողներ են լինելու»:
ԱՄՆ–ի կողմից առեւտրային սահմանափակումների դեմ է դուրս եկել նաեւ Գերմանիայի կառավարությունը, նշելով, որ այդ միջոցները զգալի ազդեցություն կգործեն գերմանական արտահանողների վրա: Ավստրիայի կանցլեր Սեբաստիան Կուրցը, իր հերթին, ԵՄ-ից պահանջել է կոշտ գործողությունների դիմել։