Կովկասում ՀԱՊԿ անդամ երկրների համար ռազմական անվտանգության առումով շարունակում են զգալի խնդիրներ պահպանվել: Այս մասին մարտի 6-ին «ՀԱՊԿ անդամ պետությունների համար ռազմական անվտանգության հիմնական սպառնալիքները» թեմայով Մոսկվա-Երեւան-Աստանա-Բիշքեկ-Մինսկ հեռուստակամուրջի ժամանակ հայտարարել է ՀԱՊԿ-ի միացյալ շտաբի պետ գեներալ-գնդապետ Անատոլի Սիդորովը:
Դրանք, ըստ գեներալ-գնդապետի, հիմնականում պայմանավորված են սառեցված հակամարտություններով, ինչպես նաեւ ԱՄՆ-ի եւ Արեւմտյան երկրների՝ այս տարածաշրջանում իրենց ազդեցությունն ուժեղացնելու ձգտմամբ: «Նրանք ցանկանում են վերահսկողություն հաստատել Կասպից ծովի եւ Անդրկովկասի հումքային պաշարների նկատմամբ: Լարվածության պարբերական սրումը բնութագրում է իրավիճակը Լեռնային Ղարաբաղում»,- հավելել է Սիդորովը:
Սակայն, ինչպես նշել է ՀԱՊԿ-ի միացյալ շտաբի պետը, միջնորդների ջանքերի շնորհիվ հաջողվել է որոշ չափով կրճատել առճակատման ներուժը է եւ նախանշել այս ճգնաժամի լուծման նոր համապարփակ պլանի նախապատրաստման ուղիները: Նրա խոսքով՝ Կովկասում եւ կոլեկտիվ անվտանգության այլ տարածաշրջաններում իրավիճակի վրա չափազանց բացասական ազդեցություն է գործում մեղմ ասած բարդ իրավիճակը Մերձավոր Արեւելքում: