ՌԴ պաշտպանության նախարարությունը մանրամասնել է Սիրիայում տրանսպորտային ինքնաթիռի վթարի զոհերի թիվը: Ըստ նախարարության տվյալների` վթարի ժամանակ զոհվել է 33 ուղեւոր եւ անձնակազմի վեց անդամ, հաղորդում է «ՌԻԱ Նովոստին»:
ՊՆ-ն նաեւ հաղորդել է, որ ինքնաթիռում գտնվողները բոլորը ռուս զինծառայողներ էին:
ՌԴ ՕՏՈւ Ան-26 ինքնաթիռը մարտի 6-ին Սիրիայի Լաթաքիայի նահանգում գտնվող Խմեյմիմ օդանավակայանում վայրէջքի ժամանակ վթարի է ենթարկվել: Ինքնաթիռը հարվածել է գետնին՝ մոտ 500 մ չհասնելով թռիչքավայրէջքային գոտուն:
Ավելի վաղ պաշտպանության նախարարությունը հաղորդել էր, որ ինքնաթիռը չի ենթարկվել հրաձգության, իսկ վթարի պատճառը կարող է լինել տեխնիկական անսարքությունը: ՊՆ հատուկ հանձնաժողովը աղետի հետաքննությունն է իրականացնում: Գլխավոր զինվորական դատախազությունը փաստի առթիվ ստուգումներ է կատարում: