Կարտելային համաձայնությունների մեխանիզմները, որոնք դրված են նախագծում եւ գործող օրենքում, բավարար չեն: Այս մասին, այսօր՝ մարտ 7-ին, ԱԺ արտահերթ նիստում, «Տնտեսական մրցակցության պաշտպանության մասին» Հայաստանի Հանրապետության օրենքում լրացումներ եւ փոփոխություններ կատարելու մասին» օրենքի նախագծի քննարկման ժամանակ նշեց «Ելք» խմբակցության պատգամավոր Արտակ Զեյնալյանը: Նրա խոսքով, իրականում միջազգային պրակտիկայում կան մեխանիզմներ, որով մրցակցության խնդիրներով զբաղվող կառույցներին օպերատիվ-հետախուզական գործողություններ իրականացնելու լիազորությամբ են օժտում, ինչը ավելի արդյունավետ է, քան այսօր գործող օրենքում առկա կարգավորումները:
«ՏՄՊՊՀ նախագահ Արտակ Շաբոյանն ասաց, որ անուղղակի ապացույցներով են պարզում նման համաձայնությունները: Անուղղակի ապացույցներով չեն կարող մարդուն պատասխանատվության ենթարկել, պետք են ուղղակի ապացույցներ»,-ընդգծեց Զեյնալյանը:
Ինչ վերաբերում է գներին, մասնավորապես, «չհիմնավորված բարձր» եւ «չհիմնավորված ցածր» գին սահմանելուն, ապա «Ելք»-ի պատգամավորը նկատեց. «Եթե մենք առաջին, ելակետային գինը չգիտենք օրինական է, թե ոչ, չկա չափանիշ, մնացած բոլոր վարույթներն անօրինական են: Բոլոր մենաշնորհ ունեցողները միշտ կարողացել են հիմնավորել իրենց կողմից դրված գինը՝ լինի բանանի, թե բենզինի դեպքում: Եթե պետությունը միջամտում է գնին, ապա հանգում է այն նույն արդյունքին, ինչ հանգեց ԽՍՀՄ-ը, երբգներն էին վերահսկում, ոչ թե նպաստում էին մրցակցությանը»,-ընդգծեց նա:
