Վարչապետի պաշտոնում «Ելք»-ի թեկնածուն ամենայն հավանականությամբ կլինի դաշինքի լիդերներից մեկը: Այս մասին «Ամերիկայի ձայն»-ին տված հարցազրույցում նշել է «Ելք» խմբակցության պատգամավոր Էդմոն Մարուքյանը:
Նրա խոսքով, բոլոր կանխատեսումներով ու վերլուծություններով, Սերժ Սարգսյանը լինելու է ՀՀԿ-ի կողմից վարչապետի թեկնածուն, ինչը երկրի ղեկավարման համատեքստում երրորդ ժամկետ է. «Սա մեզ համար անընդունելի է: Մենք խորհրդարանում ամեն կերպ կվիճարկենք, մարտահրավեր կնետենք եւ բնականաբար դեմ կքվեարկենք: Դրանից զատ մենք կունենանք մեր թեկնածուին, կարծում եմ, որը որոշակի մրցակցային պրոցես կձեւավորի խորհրդարանի մակարդակում: «Ելք» դաշինքը դեռ չի քննարկել թեկնածուի հարցը: Բնական է, որ հարցը կքննարկվի դաշինքի լիդերների, կամ դաշինքը լիդերներից զատ այլ թեկնածուի էլ կարող է քննարկել, որեւէ կերպ սահմանափակված չենք»,-ընդգծել է Մարուքյանը:
Անդրադառնալով հայ-ամերիկյան հարաբերություններին նա ընդգծել է, որ Հայաստանի ԱԺ պատվիրակության այցը պատմական է, որովհետեւ վերջին 10-15 տարում այսպիսի բազմակուսակցական պատվիրակություն չի եղել ԱՄՆ-ում:
Նրա խոսքով, մեծ պոտենցիալ կա չօգտագործված եւ կա քաղաքական կամք այդ պոտենցիալն օգտագործելու. «Ակնկալում ենք ամերիկյան ներդրումների աճ, ՀՀ-ում ընթացող բարեփոխումներին աջակցություն: Հիմա Հայաստանում ինստիտուտներ են կառուցվում ու եթե սխալ կառուցվեն, հետո գան մեզ ասեն՝ բա գիտեք, այս բանը այսպես պետք է լիներ, արդեն ուշ կլինի»,-ասաց Մարուքյանը՝ հավելելով, որ ԱՄՆ-ում բավականին տեղեկացված են Հայաստանում ընթացող քաղաքական պրոցեսներից եւ տարածաշրջանի իրավիճակից:
