Չինաստանի իշխանությունները 2013-ից 2017 թվականներին 101 բարձրաստիճան պաշտոնյաների դեմ հարուցված կոռուպցիայի գործեր են քննել, նշված է ուրբաթ հրապարակված Չինաստանի Գերագույն ժողովրդական դատարանի զեկույցում, փոխանցում է «ՌԻԱ Նովոստի»-ն:
Վերջին 5 տարիների աշխատանքի վերաբերյալ դատարանի զեկույցը ներկայացվել է 13-րդ գումարման Ժողովրդական ներկայացուցիչների համաչինական ժողովի առաջին նստաշրջանում:
Նշվում է, որ քննության տակ գտնվող պաշտոնյաների թվում կան նախարարական եւ նահանգային մակարդակի բարձրաստիճան պաշտոնյաներ:
5 տարում տարբեր ատյանների դատարանները ընդհանուր քննել են կոռուպցիայի վերաբերյալ 195 հազար գործ՝ ավելի քան 263 հազար մարդկանց նկատմամբ, որոնք տարբեր պաշտոններ են զբաղեցել: Այս ժամանակահատվածում ավելի քան 13 հազար մարդ մեղավոր է ճանաչվել կաշառք տալու մեղադրանքով:
Հնգամյա ժամանակահատվածում երկրի դատարանները քննել են մոտ 789 մլն գործ, ներկայումս որոշում է կայացվել մոտ 86 մլն գործով, ըստ որում՝ բոլոր գործերով անցնող միջոցների ընդհանուր գումարը անցել է 20 տրլն յուանից (3,15 տրլն դոլար):
Նշված ժամանակահատվածում միայն Չինաստանի Գերագույն ժողովրդական դատարանը քննել է 82 383 գործ, որոշումներ են կայացվել 79 692 գործերով, հրապարակված տվյալների համաձայն՝ այս ցուցանիշները 60,6 տոկոսով եւ 58,8 տոկոսով համապատասխանաբար ավելի են նախորդ հնգամյա ժամանակահատվածի ցուցանիշներից:
Կոռուպցիայի դեմ պայքարի խոշորածավալ արշավը սկսվել է 2012 թվականի նոյեմբերի Չինաստանի Կոմունիստական կուսակցության ԿԿ գլխավոր քարտուղարի եւ 2013-ի մարտին Չինաստանի նախագահի պաշտոններում Սի Ցզինպինի ընտրվելուց հետո: Վերջին տեղեկություններով՝ Չինաստանի ԿԿ Կենտրոնական հանձնաժողովի կարգապահական ստուգումներով վերջին 5 տարում համապատասխան խախտումների համար պատժվել է ԿԿ 1,53 մլն-ից ավելի անդամ: