Հայաստանը չի դառնա խորհրդարանական երկիր, քանի դեռ 4-րդ նախագահը չի ընտրվել ժողովրդի կողմից: Այս մասին այսօր՝ մարտի 9-ին, լրագրողների հետ զրույցում ասաց փաստաբան Վահե Գրիգորյանը:
«Դա իմիտացիա է, 4-րդ նախագահին ընտրում են Հայաստանի Հանրապետության քաղաքացիները, Սահմանադրության պահանջն է այդպիսին, Սահմանադրության բովանդակային պահանջն է դա: Ես Սահմանադրության տեքստը չեմ մեկնաբանում, ես հղում եմ տալիս ուղիղ տեքստին»,- ասաց Վահե Գրիգորյանը:
Հիշեցնենք, որ դեռ խորհրդարանի կողմից նախագահի ընտրությունից շաբաթներ առաջ Վահե Գրիգորյանը հարցազրույց էր տվել եւ հայտնել, որ 2015-ին ընդունված սահմանադրական փոփոխությունների 125–րդ հոդվածի համաձայն 4–րդ նախագահը չի կարող ընտրվել Ազգային ժողովի կողմից, քանի որ այդ կարգը սահմանող 125-րդ հոդվածը ուժի մեջ է մտնելու ՀՀ 4–րդ նախագահի լիազորությունների ստանձնման օրը։ Ըստ փաստաբանի՝ ստացվում է, որ նախագահը պետք է ընտրվի նախկին Սահմանադրությամբ ամրագրված կարգով՝ ժողովրդի քվեով։