Արագածոտնի մարզի Օհանավան գյուղի բնակիչների՝ խնձորով բեռնված բեռնատարների մուտքը ՌԴ սահման թույլատրել են, բայց այժմ էլ այլ խնդիր է առաջացել՝ Լարսը փակ է: NEWS.am-ի հետ զրույցում օհանավանցիներից Հայկը նշեց, որ իրենց գյուղի երկու բեռնատար այս պահին Լարսում է մնացել՝ ձյան պատճառով:
Նրա խոսքով, գյուղացիներին թույլ են տվել բերքը մտցնել ՌԴ տարածք միայն այն բանից հետո, երբ մաքսայինը նոր ձեւաթուղթ է տրամարդել. «Հիմա մաքսայինը փաթեթ ա տվել, արկղերի վրա գրում ենք՝ ինչ սորտի խնձոր ա, քանի կիլոգրամ ա, գույնը եւ այլն...Կարամ ասեմ, որ մեր խնդիրը մասնակի ա լուծվել, որովհետեւ մեր գյուղացիներից ում թողել են՝ Լարսում են, դեռ չեն անցել այն կետը, որտեղից թույլ չէին տալիս, որ առաջ շարժվենք, էդ կետով էլ որ անցնեն, նոր հստակ կկարողանանք ասել, որ խնդիրը լուծվել ա»,-ասաց Հակը:
Նշենք, որ օհանավանցիներն մարտի 7-ին, գյուղ տանող ճանապարհը փակել էին: Օհանավանցիները պնդում էին, որ Ռուսաստանը թույլ չի տալիս, որպեսզի Լարսից հայկական մեքենաները ՌԴ մտնեն, արդյունքում չեն կարողանում իրենց ապրանքն արտահանել Ռուսաստան: