Ադրբեջանի քաղաքացիներ Դիլհամ Ասկերովին եւ Շահբազ Գուլիեւին «բարոյական եւ ֆիզիկական կտտանքների» ենթարկելու պնդումները ոչ այլ ինչ են, քան միտումնավոր հորինվածք։ Այդ մասին NEWS.am-ին հայտնել է Արցախի նախագահի մամուլի քարտուղոր Դավիթ Բաբայանը մեկնաբանելով (İnternational Human Rights Defence committe (CIPDH) հնչեղ անունով ինչ-որ մի կազմակերպության տարածած հայտարարությունը։
«Ադրբեջանական լրատվամիջոցներում հրապարակված այդ հայտարարության ոճից կարելի է ենթադրել, որ այդ կազմակերպությունը գրանցված է Սումգայիթում կամ Բաքվում։ Անզեն աչքով էլ տեսանելի է՝ հայտարարությունը կեղծ է՝ ներծծված ադրբեջանական նավթով կամ խավիարով։ ԿԽՄԿ-ն նշված անձանց պահման եւ առողջական վիճակի դիտարկումներ է անում, եւ կտտանքների որեւէ հետք չի հայտնաբերվել»,- ընդգծել է Բաբայանը։
Միեւնույն ժամանակ նա հիշեցրել է Ադրբեջանում մարդու իրավունքների բազմաթիվ խախտումների մասին, հատկապես ազգային փոքրամասնությունների, գերիների, կալանավորվածների նկատմամբ։
Հիշեցնենք, որ Ադրբեջանի քաղաքացիներ Շահբազ Գուլիեւը (1968թ. ծնված), Դիլհամ Ասկերովը (1960թ. ծնված), ինչպես նաեւ սպանված երրորդ մասնակից Հասան Հասանովը, ունենալով զենք եւ զինամթերք, 2014թ. հունիսի 29-ին ապօրինաբար հատել էին ԼՂՀ պետական սահմանը եւ ներխուժել Հանրապետության Շահումյանի շրջանի տարածք՝ հետախուզական գործողությունների նպատակով:
Տվյալ անձինք հատուկ առաջադրանքով տեղեկություններ էին հավաքել եւ լրտեսական գործունեություն իրականացրել: Ավելին, նրանք զենքի գործադրմամբ հուլիսի 4-ին առեւանգել էին ԼՂՀ անչափահաս քաղաքացի Սմբատ Ցականյանին, որի մարմինը հրազենային վնասվածքներով հայտնաբերվել էր հուլիսի 15-ին Քարվաճառ եւ Մանաշիդ համայնքների միջեւ ընկած անտառային զանգվածում: Բացի այդ, Հասանովը հուլիսի 11-ի երեկոյան Վարդենիս-Քարվաճառ ճանապարհի 32-րդ կմ-ին ազգային ատելության հողի վրա հրազենով սպանել էր Երեւանի բնակիչ Սարգիս Աբրահամյանին (1971թ. ծնված), իսկ Կոտայքի մարզի Ձորաղբյուր գյուղի բնակիչ Կարինե Դավթյանին հրազենային վնասվածքներ էր հասցրել: Նա զինված դիմադրություն էր ցույց տվել ձերբակալման ժամանակ եւ վնասազերծվել:
Նշենք, որ ԼՂՀ ընդհանուր իրավասության առաջին ատյանի դատարանի վճռով Դիլհամ Ասկերովը դատապարտվել է ցմահ, իսկ Գուլիեւն էլ՝ 22 տարվա ազատազրկման:
