Հայաստանում մաքսատանը էլեկտրամոբիլներ ներմուծողներին ստիպում են էկոհարկ մուծել:
ABC իրավաբանական կենտրոնի տնօրեն Արա Խաչատրյանը որպես կոնկրետ օրինակ ներկայացրեց Nussan Leaf էլեկտրամոբիլի մաքսազերծման դեպքը, որը բերել էր Արտեմ Դավթյանը: Բացի այն, որ տերը ստիպված էր եղել 28 հազար դրամ էկոհարկ վճարել, վճարման օրդերում նշված էին ավտոմեքենայի պարամետրերը, այդ թվում՝ նաեւ շարժիչի տարողությունը: «Ակնհայտ է, որ ավտմեքենան գրանցվել է որպես այլ տեսակի մեքենա»,- կարծում է իրավաբանը: Ըստ որում՝ նա հիշեցրեց, որ մեծ թվով երկրներում էլեկտրամոբիլներն ազատված են ոչ միայն էկոլոգիայի հարկից, այլ նաեւ մաքսատուրքից: Նման վերաբերմունքն այնքան էլ չի համապատասխանում կառավարության՝ տրանսպորտի էկոլոգիապես մաքուր տեսակներին անցնելու կարեւորության մասին հայտարարությունների համատեքստին, նշեց իրավաբանը:
Նրա խոսքով՝ համանման դեպքերը շատ են, փաստորեն, էլեկտրամոբիլներ ներկրող բոլորին ստիպում են այս հարկը վճարել: Ներմուծողները կարող են բողոքարկման իրավունքից օգտվել, սակայն առայժմ նման դեպքեր հայտնի չեն: Իրավաբանը հստակեցրեց, որ խնդիրը ձեւակերպումների մեջ է: «Օրենքով չի նախատեսվում էլեկտրամոբիլների համար այս տեսակի հարկման չեղարկում: Օրենքը նախատեսում է արտանետումների համար հարկ: Չկա արտանետում, չպետք է լինի նաեւ հարկում: Սակայն Հայաստանում այլ կերպ է ստացվում»,- նշեց իրավաբանը: