Մաքսային կոմիտեի հետ շփման մեջ մի շարք նյուանսներ կան: Այս մասին մարտի 12-ին լրագրողների հետ հանդիպման ժամանակ հայտարարեց «Տուգանք» հասարակական միության նախագահ, փաստաբան Արտակ Խաչատրյանը:
Նրա խոսքով՝ եթե ճանապարհային ոստիկանության կողմից դուրս գրված տուգանքը կարելի է բողոքարկել՝ չզրկվելով վարորդական իրավունքից, ապա ավտոմեքենայի ներկրման համար նախատեսված վճարումները կարելի է բողոքարկել միայն վճարումից հետո կամ՝ հրաժարվելով մոտ ժամանակներս մեքենան հետ ստանալու մտքից: Մաքսային կոմիտեի դեմ միայնակ պայքարելով ինչ-ոչ բանի հասնելու փորձերը փաստաբանը համեմատեց Վարդան Մամիկոնյանի՝ պարսկական բանակի դեմ ճակատամարտի հետ:
Ինչպես նշեց ABC իրավաբանական կենտրոնի տնօրեն Արա Խաչատրյանը, 2017 թվականից ավտոմեքենաներ ներմուծողներին ընձեռնվել ավտոմեքենան ներկրել ապրանքագրի արժեքով: Սակայն կանոնը կիրառվել է ըստ հայեցողության. Ճապոնիայից ներկրվող ավտոմեքենաների փաստաթղթերը ընդունվել են, իսկ ԱՄՆ-ից՝ ոչ՝ հաշվի առնելով անվստահությունն ամերիկացիների հանդեպ:
Հունվար ամսից Մաքսային կոմիտեն իր կայքում տեղադրել է ավտոմեքենաների՝ ըստ մակնիշների մաքսազերծման գները, որպեսզի քաղաքացիները հեշտությամբ կարողանան պլանավորել, իսկ կոռուպցիոն ռիսկերը նվազեն: «Սակայն արժեքը կախված է ոչ միայն մակնիշից եւ թողարկման տարվանից, այլեւ նաեւ՝ մեքենայի վազքից եւ ընդհանուր վիճակից»,- նշեց իրավաբանը: Ընդ որում, նա հիշեցրեց, որ մի քանի ամիս առաջ ավտոմեքենաներ պատվիրած քաղաքացիները տհաճ փաստի առջեւ են կանգնել: