Գարեգին Բ Ամենայն Հայոց Կաթողիկոսն այսօր՝ մարտի 12-ին, Մայր Աթոռ Սուրբ Էջմիածնում ընդունել է Հայաստանի Հանրապետությունում Բրազիլիայի Դաշնային Հանրապետության նորանշանակ արտակարգ եւ լիազոր դեսպան Մենդոնսա Սանկտոսին եւ նրա տիկնոջը` Սիմոնե Հագենաուեր Ռոգատտի Սանկտոսին:
Նորին Սրբությունը շնորհավորեց դեսպանին նշանակման կապակցությամբ՝ մաղթելով նրան արդյունավոր առաքելություն Հայաստանում: Վեհափառ Հայրապետը կարեւորեց հայ-բրազիլական կապերի ամրապնդումը եւ գործակցության հետագա խթանումը:
Ամենայն Հայոց Հայրապետն այս առնչությամբ գոհունակությամբ անդրադարձավ Բրազիլիայի դեսպանության հետ Մայր Աթոռի սերտ կապերին:
Հայոց Հովվապետը վերհիշեց Բրազիլիա կատարած իր հովվապետական այցելությունները` նշելով, որ մեծապես տպավորված է Բրազիլիայի ժողովրդի զորեղ հավատքով: Գարեգին Բ Կաթողիկոսը նաեւ ուրախությամբ արձանագրեց, որ Բրազիլիայի հայությունը՝ իբրեւ կայացած համայնք, իր կարեւոր ներդրումն է բերում երկրի առաջընթացին՝ ըստ արժանվույն գնահատվելով իշխանությունների կողմից:
Այնուհետեւ նորանշանակ դեսպանը Գարեգին Բ Վեհափառին ներկայացրեց առաջիկա իր ծրագրերը, որոնցով պիտի ջանա ավելի ճանաչելի դարձնել Հայաստանը Բրազիլիայում:
Զրույցի ընթացքում դեսպանը կարեւորեց հայ-բրազիլական մշակութային եւ տնտեսական կապերի զորացմանն ուղղված միջոցառումների իրականացումը, լուսաբանություններ տվեց Բրազիլիայի ժողովրդի հոգեւոր կյանքի վերաբերյալ:
Հանդիպմանը ներկա էր Մայր Աթոռի Արտաքին հարաբերությունների եւ արարողակարգի բաժնի տնօրեն Գերաշնորհ Տ. Նաթան արքեպիսկոպոս Հովհաննիսյանը:
