Մարտի 11-ին Հայաստանի 7 մարզերի 20 համայնքում տեղական ինքնակառավարման մարմինների ընտրություններ էին: Նախնական տվյալներով՝ դրանց, ընդհանուր առմամբ, մասնակցել է ընտրելու իրավունք ունեցողների 44.91 տոկոսը: Կենտրոնական ընտրական հանձնաժողովի տվյալներով՝ մասնակցության ամենաբարձր ցուցանիշն արձանագրվել է Դեբետ համայքում՝ 74.35 տոկոս, ամենացածրը՝ Դաշտ եւ Մեծամոր համայնքներում՝ շուրջ 28 տոկոս: Համայնքի ղեկավարների ընտրությանը 9 թեկնածու առաջադրել էր Հանրապետական կուսակցությունը, 2 թեկնածու ուներ ԲՀԿ-ն, եւս 8 թեկնածու ինքնառաջադրվել էր: Ավագանու անդամի թեկնածուներ էլ առաջադրել էին ՀՀԿ-ն եւ ՀՅԴ-ն: Ընդդիմադիր «Ելք» դաշինքն այս ընտրություններում ոչ մի թեկնածու չուներ:
Ադրբեջանում մեկնարկած զորավարժությունները ԵԱՀԿ-ի առջեւ այդ երկրի ստանձնած պարտավորությունների խախտում են: Հայաստանի ԱԳՆ-ն այսպես է արձագանքել ադրբեջանական զինուժի վարժանքներին: Գերատեսչության խոսնակը թվիթերյան գրառմամբ պարզաբանել է, որ Բաքուն ԵԱՀԿ անդամ պետություններին չի տեղեկացրել զորավարժությունների մասին:
Հայաստանյան քաղաքական ուժերի ներկայացուցիչներն էլ զորավարժությունները միջազգային հանրության վրա ճնշում գործադրելու փորձ եւ քաղաքական հնարք են որակել: ՀՀԿ խոսնակ Էդուարդ Շարզամանովը, սակայն, չի կարծում, որ Ադրբեջանում նախագահական ընտրություններից առաջ Բաքուն շփման գծում իրավիճակի սրման կգնա: Նշենք, որ մարտի 12-17-ը անցկացվելիք լայնածավալ զորավարժություններին, ադրբեջանական աղբյուրների համաձայն, ներգրավված է, մասնավորապես, մինչեւ 25 հազար զինծառայող, ծանր զրահատեխնիկա, հրթիռահրետանային կայանքներ, ավիացիա: Այդ ընթացքում նախատեսվում է նաեւ նոր զինատեսակների կիրառում:
Իրանում թուրքական ուղեւորատար օդանավի կործանման հետեւանքով 11 մարդ է զոհվել՝ 8 ուղեւորներն ու անձնակազմի 3 անդամները: Զոհերի մարմիններն արդեն գտել են: Օդանավը Շարժա-Ստամբուլ չարտերային չվերթ է իրականացրել: Այն պատկանում էր թուրքական Başaran Holding ընկերությանը: Նշենք, որ օդանավում եղել են ընկերության ղեկավար, թուրք գործարար Հուսեյն Բաշարանի դուստրն ու նրա 7 ընկերները:
Ինքնաթիռը ռադարների էկրաններից անհետացել է Իրանի տարածքում եւ ընկել Շահրե-Քորդ քաղաքի մերձակայքում՝ Թեհրանից 400 կմ դեպի հարավ: Ընկնելուց հետո օդանավը հրդեհվել է: Վարկածներից մեկի համաձայն՝ ավիաաղետի պատճառ կարող էր դառնալ շարժիչի բռնկումը: Արդեն հայտնաբերել են նաեւ օդանավի «սեւ արկղը», առաջիկայում այն կփոխանցվի միջադեպը հետաքննող մարմիններին:
Հանրային քննարկման է դրվել «Հաց բերողի»՝ Արթուր Սարգսյանի հուշարձանի նախագիծը: Ճարտարապետներ Անահիտ Թարխանյանի եւ Արմինե Ղազարյանի նախագծած հուշարձանի նախատիպը կքննարկվի մինչեւ մարտի 17-ը, հետո միայն վերջնականապես կորոշվի, թե ինչ տեսք կունենա: Նախաձեռնողները ցանկանում են հուշարձանը տեղադրել Երեւանի Մաշտոցի պուրակում: Նախագիծն արդեն ուղարկել են քաղաքապետարան եւ հույս ունեն, որ հուշարձանը տեղադրելու թույլտվություն կստանան: Հիշեցնենք, որ 2016 թվականի հուլիսին, երբ «Սասնա ծռերը» գրավել էին ոստիկանության ՊՊԾ գունդը, Արթուր Սարգսյանը ճեղքել էր ոստիկանական պատը եւ հաց հասցրել զինված խմբի անդամներին: Առողջական խնդիրներ ունեցող Արթուր Սարգսյանը ձերբակալվեց, իսկ անազատության մեջ նրա վիճակը վատթարացավ: Հասարակական ճնշման ներքո Հաց բերողն ազատ արձակվեց, բայց օրեր անց վախճանվեց:
Առողջապահության համաշխարհային կազմակերպությունը զգուշացրել է նոր՝ այսպես կոչված, «Իքս հիվանդության» գլոբալ համաճարակի հավանականության մասին: Գիտնականներն արդեն հետազոտում են առավել տարածված ախտածինները: Ըստ մասնագետների՝ «Իքս հիվանդության» դրսեւորման տարբեր աղբյուրներ կան. մշտապես փոփոխվող հայտնի վարակներ, կենդանիներից փոխանցվող վիրուսներ, ինչպես նաեւ արհեստականորեն ստեղծված վիրուսներ, օրինակ՝ կենսաբանական զենք, որը կարող են լաբորատորիաներից գողանալ: ԱՀԿ փորձագետները զգուշացնում են, որ նոր համաճարակը կարող է մարդկության համար նույնքան մահաբեր լինել, ինչպես 20-րդ դարասկզբին իսպանական գրիպը. 1918-1919 թվականներին դրա համաճարակի հետեւանքով մի քանի տասնյակ միլիոն մարդ է մահացել:
82 տարեկանում կյանքից հեռացել է ռուս հայտնի դերասան Օլեգ Տաբակովը: Վերջին մի քանի ամիսներին արտիստը հիվանդանոցում էր: Անցյալ տարվա նոյեմբերից Տաբակովի առողջական վիճակի մասին հակասական տեղեկություններ էին ստացվում. նախ հաղորդվեց, որ դերասանի մոտ թոքաբորբ է ախտորոշվել, եւ շուտով դուրս կգրվի հիվանդանոցից, իսկ ավելի ուշ հայտնի դարձավ, որ նրա առողջական վիճակն ավելի ծանր է, միացված է արհեստական շնչառության սարքին: Օլեգ Տաբակովը հանդիսատեսին հայտնի է «Պատերազմ եւ խաղաղություն», «Գարնան 17 ակնթարթները», «12 աթոռ» եւ այլ ֆիլմերից: Նրա ձայնը հայտնի է նաեւ մանուկներին. հնչյունավորել է Մատրոսկին կատվին «Երեքը Պրոստոկվաշինոյից» եւ «Արձակուրդները Պրոստոկվաշինոյում» մուլտֆիլմերում:
Հենրիխ Մխիթարյանը սկսել է տպավորիչ խաղ ցուցադրել Լոնդոնի «Արսենալ»-ի կազմում: Հայ ֆուտբոլիստը «Արսենալ»-«Ուոթֆորդ» խաղի լավագույն ֆուտբոլիստ է ճանաչվել: Քվեարկությունն անցկացվել է լոնդոնյան ակումբի թվիթերյան էջում: Լոնդոնում կայացած խաղում, որում «Արսենալը» հաղթել է 3:0 հաշվով, Հայաստանի հավաքականի ավագը մեկնարկային կազմում հանդես է եկել 78 րոպե եւ դարձել գոլի ու գոլային փոխանցման հեղինակ: Նշենք, որ Պրեմիեր լիգայի մեկնարկային 6 խաղերում Հենրիխ Մխիթարյանը մեկ գոլի եւ 4 գոլային փոխանցման հեղինակ է դարձել:
Մարտի 12-ին դոլարը կայուն է եղել, եվրոն ավելի քան 5 դրամով էժանացել է: Դոլարի փոխարժեքն արդյունքում կազմել է 480 դրամ, եվրոյինը՝ 591, ռուբլունը՝ 8 դրամ 46 լումա, ֆունտինը՝ 666 դրամ:
Մարտի 13-ին հանրապետությունում սպասվում է առանց տեղումների եղանակ: Օդի ջերմաստիճանն աստիճանաբար 3-5 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +0+2, ցերեկը՝ +15+17 աստիճան տաքություն: