Իրաքի կառավարությունը չեղարկել է Իրաքյան Քուրդիստանի ինքնավար մարզ միջազգային ավիաթռիչքների արգելքը։ Այս մասին հայտարարել են Իրաքի վարչապետի մամուլի ծառայությունից։
«Իրաքի վարչապետ, Զինված ուժերի գլխավոր հրամանատար Հայդեր ալ Աբադին, ելնելով իր սահմանադրական լիազորություններից, հայտարարել է միջազգային չվերթերի վերականգնման մասին դեպի Էրբիլի եւ Սուլեյմանի օդանավակայաններ՝ Քուրդիստանի մարզի իշխանությունների հետ համաձայնեցնելուց հետո նրանց դաշնային իշխանության ենթակայության ներքո վերադառնալու արդյունքում»,–նշված է հայտարարության տեքստում։
Հիշեցնենք, որ Իրաքի դաշնային իշխանությունների եւ Իրաքի Քուրդիստանի հարաբերությունները սրվել էին 2017 թվականի սեպտեմբերի 25-ին Իրաքի Քուրդիստանում անցկացված հանրաքվեից հետո, որին մասնակցածների ավելի քան 93 տոկոսը կողմ էր քվեարկել Իրաքի Քուրդիստանի անկախացմանը։ Հանրաքվեից հետո դաշնային իշխանությունները մի շարք պատժամիջոցներ էին սահմանել Քուրդիստանի ինքնավար մարզի դեմ։