Հայաստանի կառավարությունը մրցույթ է հայտարարել ինտերնետ մատարարարողների շրջանում՝ Հայաստանի ողջ տարածքով 100 մեգաբիթ արագությամբ հեռահաղորդակցության օպտիկա-մալուխային ցանց ստեղծելու համար: Այս մասին NEWS.am- Ինովացիայի թղթակցի հետ զրույցում ասաց Տեղեկատվական տեխնոլոգիաների զարգացմանն աջակցող խորհրդի քարտուղար Արմեն Գրիգորյանը:
Նրա խոսքով` ցանցի ստեղծումը միտված է վերացնել Երեւանի եւ հեռավոր շրջանների միջեւ առկա ճեղքվածքը, քանի որ նոր ցանցը պետք է արագագործ ինտերնետ ապահովի Հայաստանի բոլոր գյուղերում:
Ծրագրի իրականացման համար անհրաժեշտ է 60-100 մլն դոլար ներդրում կատարել: Ներդրումը կիրականացնի մրցույթում հաղթող մասնավոր ընկերությունը։ Կառավարությունը ձեռնպահ կմնա միջոցներ ներդնելուց, որպեսզի, ըստ Ա. Գրիգորյանի, մրցակցության անհավասար պայմաններ չստեղծվեն:
«Հաղթող ընկերությունը կստեղծի ցանցը եւ այն վարձակալության կտա, որից կարող են օգտվել արդեն տարբեր ընկերություններ։ Հաղթող ընկերությանը կարգելվի միայնակ շահագործել ցանցը, որպեսզի մենաշնորհ չստեղծվի»,-ասաց Ա. Գրիգորյանը:
Ներկայումս որոշ ընկերություններ առաջարկում են 100 մեգաբիթ արագությամբ ինտերնետ, սակայն ամբողջական ծածկույթ չեն ապահովում: Կառավարության այս ծրագիրը նպատակ ունի արագագործ ինտերնետը հասանելի դարձնել Հայաստանի ողջ տարածքում։
Ա. Գրիգորյանի տեղեկացմամբ՝ արագագործ ինտերնետի գինը կորոշի շուկան:
Նախատեսվում է մրցույթի արդյունքները ամփոփել առաջիկա ամիսներին, հնարավոր է՝ մինչեւ գարուն:
